काठमाडौं । नेपाल र जापानबीचको च्यारिटी फुटबल शनिबार हुँदैछ । सो फुटबल खेल्नका लागि जापानी टोली बिहीबार काठमाडौं आइपुगेको छ ।
१६ सदस्यीय टोलीले सातदोबाटोस्थित एन्फा कम्प्लेक्सको मैदानमा अभ्यास पनि गरेको छ ।
सन् २००२ को विश्वकपका टोली खेलाडी मिडफिल्डर काजुयिका टोडाको कप्तानीमा जापानी टोली नेपाल आएको हो ।
टोडाले नेपालको पछिल्लो सोलिडारिटी कपको उपाधि जितेको जानकारी पाएकाले शनिबारको खेल पनि निकै रोमाञ्चक हुने प्रतिक्रिया दिएका छन् ।
नेपालको राष्ट्रिय फुटबल टोली र फ्रेन्ड्स अफ जापानबीच च्यारिटी खेल हुन लागेको हो ।
नेपाल र जापानको दौत्य सम्वन्ध स्थापना भएको ६० वर्ष पुगेको अवसरमा अखिल नेपाल फुटबल संघ एन्फा र जापानको एनजीओ कलरबाथले मिलेर खेल आयोजना गरेको हो ।
खेलबाट जम्मा भएको रकम २०७२ साल बैशाख १२ गतेको भूकम्पबाट बनेका पीडितका लािग खर्च गरिने जनाइएको छ ।
