विराटनगर । मोरङको बक्राहा खोलमा तटबन्ध निर्माणका लागि तीन अर्ब ५० करोडको गुरूयोजना तयार गरिएको छ । नदीको दुवैतर्फ पुरानो तटबन्धको उचाइमा बढोत्तरी, स्पर निर्माणलगायतका कार्य सम्पन्न गर्न गुरूयोजना तयार पारिएको जल उत्पन्न प्रकोप नियन्त्रण कार्यालयका प्रमुख देवनारायण साहले जानकारी दिए ।
जिल्लाको ५२ किलोमिटर क्षेत्रमा बग्ने सो नदीले १८ गाविसलाई प्रत्यक्ष प्रभावित पार्दै आएको छ । वर्षायाममा बाढी बस्तीमा पस्ने, बालीनालीलाई क्षति गर्नुका साथै खेतीयोग्य जमिन बगरमा परिणत हुने क्रम बढ्दै गएको छ ।
तटबन्ध निर्माणमा एक करोड ७५ लाख तथा अन्य प्रभावित क्षेत्रमा बाँकी रकम खर्च गरिनेछ । यस्तै लोहन्द्रा खोलाबाट प्रभावित क्षेत्रमा तटबन्ध निर्माण तथा मर्मतका लागि रु तीन करोड विनियोजन गरिएको छ ।
गछिया खोलाका लागि ६० लाख, बूढी खोला ५० लाख, सरजु खोला ६० लाख, सेउती खोला ६० लाख र शेरा खोलाका लागि ५० लाख रकम विनियोजन गरिएको कार्यालयका प्रमुख साहले जानकारी दिए । रासस
