सान्टियागो बर्नाबेऊ। च्याम्पियन्स लिग फुटबलको समूह चरणको अन्तिम खेलमा स्पेनको क्लव रियल मड्रिडले जर्मनीको क्लव बोरुसिया डर्टमन्डसंग २–२ गोलको बराबरी खेलेको छ । घरेलु मैदानमा खेलेको रियललाई दुवै गोल करिम बेन्जेमाले दिलाए । २८ औं मिनेटमा पहिलो गोल गरेका बेन्जेमाले ५३ औं मिनेटमा अग्रतालाई दोब्बर बनाए ।
तर त्यसपछि भने बोरुसियाले लगातार दुई गोल गर्दै बराबरी गरेको हो । यो खेलमा चर्चित खेलाडी क्रिष्टियानो रोनाल्डो भने ओझेलमा परे । उनले खासै सम्झनयोग्य सट् प्रहार गरेनन् ।
रियल रेहेको समूह एफ् को अर्को खेलमा पोल्याण्डको क्लव लेजिया वार्सजावाले पोर्चुगलको क्लव स्पोर्टिङ्गलाई १–० ले हरायो । यो समूहबाट मड्रिड र डर्टमन्ड अर्को चरणमा पुगिसकेका छन् ।
त्यस्तै समूह ई को खेलमा जर्मनीको क्लव बायर लिभरकुजेन र इङल्याण्डको टोटनह्याम हट्सपर विजयी भएका छन् । बायरले फ्रान्सको क्लव मोनाकोलाई ३–० ले हरायो । त्यस्तै टोटनह्यामले रुसी क्लव सीएसकेए मस्कोलाई ३–१ ले हरायो । यो समूहबाट ११ अंकसहित मोनाको समूह विजेता बन्दै तथा १० अंकबाट लिभरकुजेन उपविजेता बन्दै अर्को चरणमा पुगेका छन् ।
समूह एच को खेलमा इटालीको क्लव युभेन्टसले क्रोएसियाको क्लव डाइनामो जाग्रेबलाई २–० ले हराएको छ । त्यस्तै फ्रान्सको क्लव लियो र स्पेनको क्लव सेभिल्लाले भने गोलरहित बराबरी खेलेका छन् ।
यो समूहबाट १४ अंकसहित युभेन्टस समूह विजेता तथा ११ अंकसहित सेभिल्ला उपविजेता बन्दै अर्को चरणमा पुगेका छन् । योसंगै प्रिक्वार्टरफाइनल समीकरणसमेत पूरा भएको छ ।
