च्याम्पियन्स लिगको राउण्ड अफ् –१६ ‘ड्र’ सार्वजनिक, यस्तो छ रोचक भिडन्त

प्रकाशित २०७३ मंसिर २७ सोमबार

एजेन्सी । युएफा च्याम्पियन्स लिग, राउण्ड अफ सिक्सटिनको खेल तालिका सार्वजनिक भएको छ । युरोपियन फुटबलको प्रशासनिक निकाय युएफाले सोमबार राउण्ड अफ् सिक्सटिनको खेल तालिका सार्वजनिक गरेको हो ।

जारी तालिका अनुसार राउण्ड अफ् सिक्सटिनको पहिलो लेगका खेल आगामी फेब्रुअरी १४, १५, २१ र २२ मा हुने छन् भने, दोस्रो लेगका खेल मार्च ७, ८, १४ र १५ मा हुने छन् । फेब्रुअरी १४ मा इङ्गलिश क्लब म्यान्चेस्टर सिटी र फ्रेन्च क्लब मोनाको भिड्ने पक्का भएको छ ।

यस्तै, स्पेनिश क्लब रियाल मड्रिडको भिडन्त यटालियन क्लब नापोलीसँग परेको छ । जर्मन क्लब बोरुसिया डर्टमुण्डको राउण्ड अफ् सिक्सटिन भने पोर्चुगिज क्लब बेनिफिकासँग हुने पक्का भएको छ । यस्तै, जर्मन क्लब बायर्न म्युनिख र इङ्गलिश क्लब आर्सनलबीचको खेल फुटबल समर्थकका लागि बहुप्रतिक्षित हुनेछ ।

एटालियन क्लब युभेन्टस र पोर्चुगिज क्लब एफसी पोर्टो खेल्दा जर्मन क्लब बायर लिभुकुजेन र स्पेनिश क्लब एथ्लेटिको मड्रिड आमने सामने हुने छन् ।

यस्तै, स्पेनिश हस्ती बार्सिलोना फ्रेन्च क्लब पेरिस सेन्ट जर्मेनसँग भिड्ने भएको छ । गत सिजन इङ्गलिश प्रिमियर लिग कब्जा गरेको लेस्टर सिटीले स्पेनिश क्लब सेभियासँग खेल्ने पक्का भएको छ ।