गुडिसन पार्क । इङलिश प्रिमियर लिग फुटबल अन्तर्गत मर्सीसाइड डर्बीमा लिभरपुल विजयी भएको छ । आफ्नै सहरको एभर्टनले घरेलु मैदानमा खेलेको खेलमा लिभरपुल १–० ले विजयी भएको हो ।
इन्जुरी समयको चौथो मिनेटमा सादियो मानेले लिभरपुललाई निर्णायक गोल दिलाएका हुन् । खेलमा निकै तनाव भएको थियो । खेलाडीहरु आपसमा झगडासमेत गरे ।
रेफ्रीले एभर्टनका तीन तथा लिभरपुलका एक खेलाडीलाई पहेंलो कार्ड पनि देखाए ।
तर अन्तिम समयमा लिभरपुलले गोल गर्दा भने इङलिश फुटबल विष्लेषकहरुले यो खेललाई ‘कडा खेलको नरम नतिजा’ भनी प्रतिक्रिया दिएका छन् ।
एभर्टनका दर्शकले ब्यङ्ग्य कस्दै २१ औं हेप्पी बर्थडेसमेत मनाएका छन् । एभर्टनले ट्रफी नजितेको २१ वर्ष पुगेको छ । फ्यानले ट्रफीको खडेरीका रुपमा यस्तो हर्कत गरेका हुन् ।
यो जितले भने लिभरपुल लिगको दोस्रो स्थानमा पुगेको छ । १७ औं चरणको समाप्तिसम्म चेल्सी ४३ अंकसहित शीर्ष स्थानमा छ भने लिभरपुल ३७ अंकसहित दोस्रो स्थानमा पुगेको हो । म्यानचेष्टर सिटी ३६ अंकबाट तेस्रो स्थानमा झरेको छ ।
