स्टामफोर्ड ब्रिज । इङलिश प्रिमियर लिग फुटबलमा चेल्सीको विजयी यात्रा १३ खेलसम्म पुगेको छ । निरन्तर १३ खेल जित्ने क्रममा चेल्सीले न्यू इयर इभको राति स्टोक सिटीलाई घरेलु मैदानमा ४–२ ले हरायो ।
चेल्सीलाई विजयी गराउने क्रममा विलियनले दुई तथा डिएगो कोस्टा र गेरी काहिलले एक एक गोल गरे । स्टोकका पिटर क्रच र बु्रनोले एक एक गोल फर्काए ।
जितसंगै चेल्सी उपाधितिर अगाडि बढेको छ । १९ खेलबाट ४९ अंक भइसकेको छ । दोस्रो स्थानको लिभरपुलको ४३ अंक छ । लिभरपुलले आफ्नो १९ औं खेलमा घरेलु मैदानमा एन्फिल्डमा अर्को उपाधि दावेदार म्यानचेष्टर सिटीलाई हरायो ।
यो सबैभन्दा ठूलो खेलमा लिभरपुललाई जिताउन खेलको ८ मिनेटमै जर्जिनिओ विनाल्डमले निर्णायक गोल गरे ।
हारपछि पनि तेस्रो स्थानमै रहेको म्यानचेष्टर सिटीको ३९ अंक छ ।
त्यस्तै म्यानचेष्टर युनाइटेडले पनि घरेलु मैदानमा लगातार पाँच जित हासिल गरेको छ । ३६ अंकका साथ छैटौं स्थानमा रहेको म्यानचेष्टर युनाइटेडले मिडिल्स ब्रोलाई घरेलु मैदान ओल्ड ट्राफोर्डमा २–१ ले हरायो ।
म्यानचेष्टरलाई जिताउन एन्थोनी मार्सियल र पल बोग्बाले अन्तिम पाँच मिनेटमा एक एक गोल गरे । यसअघि ६७ औं मिनेटमा ग्रान्टको गोलबाट मिडिल्सब्रोले अग्रता लिएको थियो ।
लिगका अन्य खेलहरुमा बर्नलेने सन्डरल्याण्डलाई ४–१ ले, लेस्टर सिटीले वेष्टह्यामलाई १–० ले, वेष्टब्रोमले साउथह्याम्पटनलाई २–१ ले तथा बर्नमाउथले स्वान्सीलाई ३–० ले हरायो ।
