इत्तेहाद मैदान । १० जनामा समेटिएर पनि म्यानचेष्टर सिटीले इङलिश प्रिमियर लिग फुटबलमा कमालको प्रदर्शन गरेको छ । बर्नले विरुद्ध सोमबार राति भएको खेल २–१ ले जितेर सिटीले जस्तोसुकै कठीन परिस्थितिमा पनि सक्षम भएको प्रमाणित गरेको छ ।
खेलको ३२ औं मिनेटमा फर्नान्डिन्होलाई रातो कार्डसहित गुमाएको म्यानचेष्टर सिटीले ४१ औं मिनेटमा याया टौरेले पहेंलो कार्ड खाएपछि अझ त्रसित हुनु प¥यो ।
तर ५८ औं मिनेटमा गेल सिलिचीले गोल गर्दै सिटीलाई अग्रता दिलाए । त्यसको चार मिनेटपछि सर्जियो अगुएरोको गोलबाट म्यानचेष्टर सिटीले अग्रतालाई दोब्बर ग¥यो ।
७० औं मिनेटमा बेन मीले गोल गर्दै बर्नलेलाई २–१ को स्थितिमा ल्याए पनि त्यसपछि गोल नहुँदा म्यानसिटीले बाजी मा¥यो ।
यता, म्यानचेष्टर सिटीले आफूलाई सम्हाले पनि लिभरपुल भने लत्रिएको छ । लिभरपुलले सन्डरल्याण्डविरुद्ध दुई पटक अग्रता लिएर पनि २–२ को बराबरीमै रोकिनु परेको छ ।
१९ औं मिनेटमा डानियल स्टुरिजको गोलबाट लिभरपुलले अग्रता लिए पनि २५ औं मिनेटमा जर्माइन डेफोले पेनाल्टीबाट गोल गर्दै सन्डरल्याण्डलाई बराबरीमा ल्याए ।
७२ औं मिनेटमा सादिओ मानेले गोल गर्दै लिभरपुललाई २–१ ले अग्रता दिलाए । तर डेफोले फेरि अर्को पेनाल्टी गोल गर्दै बराबरीमा ल्याए ।
लिगका अन्य खेलमा एभर्टनले साउथह्याम्पटनलाई ३–० ले पराजित गर्दा मिडिल्सब्रो र डिफेन्डिङ च्याम्पियन लेस्टर सिटीले ०–० को खेल खेले ।
त्यस्तै वेष्टब्रोमले हलसिटीलाई ३–१ ले हराएको छ । लिगमा १९ खेलबाट ४९ अंकको चेल्सीलाई निकै राहत मिलेको छ । २० खेलबाट लिभरपुल ४४ अंकमै थन्किएपछि चेल्सीले एक खेल खेल्नुअघि नै स्पष्ट पाँच अंकको अग्रता बनाएको छ ।
तेस्रो स्थानको म्यानचेष्टर सिटीको ४२ अंक छ । तर एक खेल कम खेलेको आर्सनलको ४० तथा टोटनह्यामको ३९ अंक छ ।
