स्पेन । स्पेनिश फुटबल प्रतियोगिता कोपा देल रे को प्रिक्वार्टरफाइनलमा बार्सिलोनालाई झड्का लागेको छ । राउन्ड अफ सिक्सटिनको पहिलो लेगको खेलमा बार्सिलोना एथलेटिक बिलबाओसंग २–१ ले पराजित भएको छ ।
बिलबाओको मैदानमा भएको खेलमा बिलबाओले २–० ले अग्रता लियो । २५ औं मिनेटमा आरिज एडुरिजले तथा २८ औं मिनेटमा इनाकी विलियम्सले गोल गर्दै बिलबाओलाई अग्रता दिलाए ।
दबाबमा रहेको बार्सिलोनाका चार खेलाडीले पहेंलो कार्ड खाएसंगै थप दबाब बढ्यो । ५२ औं मिनेटमा लिओनल मेसीले गोल गर्दै अन्तरलाई कम गरे ।
त्यसपछि बिलबाओका राउल गार्सिया र एन्डर इटुरास्पले ७४ औं र ८० औं मिनेटमा दोहोरो पहेंलो कार्ड खाँदै बाहिरिए ।
९ जनामा समेटिएको बिलबाओलाई बार्सिलोनाले दबाबमा राखे पनि गोल गर्न नसक्दा पराजित भयो ।
खेलका क्रममा पेनाल्टी माग्दा रेफ्रीले उल्टै एन्द्रेश एनेस्तालाई पहेंलो कार्ड देखाउँदा झन् तनाव भएको थियो ।
मेसी र नेमारले पेनाल्टी माग्दा रेफ्रीले नदिएसंगै मेसी झगडा नै गर्न पुगेका थिए । यो हारले भने अब घरेलु मैदानमा हुने दोस्रो लेगको खेलमा जितका लागि बार्सिलोनालाई दबाब बढेको छ ।
