लण्डन । इङलिश प्रिमियर लिग फुटबलमा टोटनह्याम र आर्सनलले शानदार जित हासिल गरेको छ । टोटनह्यामले घरेलु मैदानमा वेष्टब्रोमविचलाई ४–० ले हरायो ।
टोटनह्यामको जितमा ह्यारी कानेको ह्याट्रिक सामेल थियो । त्यसैगरी वेष्टब्रोमका ग्यारेथ म्याकऔलेले आत्मघाती गोल गरे । यो जितसंगै टोटनह्याम लिग तालिकाको दोस्रो स्थानमा पुगेको छ ।
२१ खेलमा ४५ अंक बटुल्दै टोटनह्याम दोस्रो स्थानमा रहेको हो । त्यस्तै २१ औं खेलमा स्वान्सी सिटीलाई ४–० ले नै हराएको आर्सनल ४४ अंकसहित तेस्रो स्थानमा पुगेको छ ।
आर्सनललाई जिताउन आर्सनलका ओलिभर जिरोड र अलेक्सिस सान्चेजले एक एक गोल गरे । तर स्वान्सीका खेलाडीहरु ज्याक कोर्क र काइल नाउटनले आत्मघाती गोल गरेपछि आर्सनल तेस्रो स्थानमा पुगेको हो ।
अन्य खेलमा बर्नलेले साउथह्याम्पटनलाई १–० ले, हल सिटीले बर्नमाउथलाई ३–१ ले, स्टोक सिटीले सन्डरल्याण्डलाई ३–१ ले तथा वेष्टह्यामले क्रिष्टललाई ३–० ले हरायो । वाट्फोर्ड र मिडिल्सब्रोले गोलरहित बराबरी खेले ।
