वीरगञ्ज भन्सारको राजस्व पेट्रोलियम पदार्थ र सवारीसाधनको आयातमा निर्भर
हाम्रा कुरा
प्रकाशित २०८२ जेठ २६ सोमबार
524
Shares
वीरगञ्ज (पर्सा) । वीरगञ्ज भन्सार कार्यालयले चालु आर्थिक वर्षको १० महिनाको अवधिमा सङ्कलन गरेको राजस्वमा पेट्रोलियम पदार्थ र सवारीसाधनको आयातले ठूलो हिस्सा ओगटेको छ। कार्यालयले यस अवधिमा पेट्रोलियम पदार्थको आयातबाट मात्रै ६४ अर्ब ५० करोड रुपैयाँ राजस्व सङ्कलन गरेको छ। यो १० महिनामा पाँच प्रकारका पेट्रोलियम पदार्थ आयातका लागि १ खर्ब ५५ अर्ब ९४ करोड रुपैयाँ खर्च भएको थियो।
वीरगञ्ज भन्सार कार्यालयका प्रमुख भन्सार प्रशासक दीपक लामिछानेले यस भन्सारको मुख्य राजस्व स्रोत नै पेट्रोलियम पदार्थ र सवारीसाधनको आयातमा निर्भर रहेको स्पष्ट पारेका छन्। कुल आयातबाट प्राप्त राजस्वमा मुख्य २० वस्तुको योगदानमध्ये पेट्रोलियम पदार्थको हिस्सा ४६.२६ प्रतिशत रहेको छ, जसले यसको अत्यधिक निर्भरतालाई झल्काउँछ।
पेट्रोलियम पदार्थपछि दोस्रो धेरै राजस्व यातायात साधन र तिनका पार्टपुर्जाको आयातबाट प्राप्त भएको छ, जसबाट १५ अर्ब २४ करोड रुपैयाँ सङ्कलन भएको छ। कुल राजस्वमा यातायातका साधन र पार्टपुर्जाको हिस्सा १०.९३ प्रतिशत छ।
त्यसैगरी, अन्य महत्त्वपूर्ण राजस्व स्रोतहरूमा फलाम तथा फलामबाट बनेका सामानबाट ५ अर्ब २५ करोड रुपैयाँ, मेसिनरी तथा पार्टपुर्जाबाट ४ अर्ब ५५ करोड रुपैयाँ, र इलेक्ट्रिक मेसिनरी, उपकरण र तिनका पार्टपुर्जाको आयातबाट ३ अर्ब ३७ करोड रुपैयाँ समावेश छन्।
चालु आर्थिक वर्षकै १० महिनामा सबै प्रकारका कपडा आयातबाट २ अर्ब ८७ करोड रुपैयाँ, सुर्ती र सुर्तीजन्य पदार्थको आयातबाट २ अर्ब २३ करोड रुपैयाँ, र शृङ्गारका सामानको आयातबाट २ अर्ब २२ करोड रुपैयाँ राजस्व सङ्कलन भएको छ। यी तथ्याङ्कले वीरगञ्ज भन्सारको राजस्व सङ्कलन ढाँचालाई स्पष्ट पार्छ।
