लण्डन । इङलिश प्रिमियर क्लवहरु बर्नले र क्रिष्टल प्यालेस एफए कप फुटबलको चौथो चरणमा प्रवेश गरेका छन् । तेस्रो चरणको खेलमा अर्को प्रिमियर क्लव सन्डरल्याण्डमाथि २–० को जित निकाल्दै बर्नले चौथो चरणमा पुगेको हो । घरेलु मैदानमा भएको खेलमा बर्नलीलाई जिताउन साम भोक्स र एन्द्रे ग्रेले एक एक गोल गरे । दुई टोलीबीचको यसअघिको खेल बराबरीमा सकिएपछि भएको रि प्ले म्याचमा बर्नलेले बाजी मारेको हो ।
यस्तै बोल्टन वान्डरर्सलाई २–१ ले हराउँदै क्रिष्टल प्यालेस पनि चौथो चरणमा पुगेको हो । त्यस्तै बार्नस्लीलाई २–१ ले हराउँदै ब्ल्याकपुल, फिटउडलाई हराउँदै ब्रिष्टल, विम्ब्लेडनलाई हराउँदै सुटोन र इप्सविचलाई १–० ले हराउँदै लिंकन पनि चौथो चरणमा पुगेको छ ।
लिंकनले भने कीर्तिमान रचेको छ । सन् १९७६ पछि प्रिमियर लिगविहीन लिंकन पहिलो पटक एफए कपको चौथो चरणमा पुगेको हो ।
एफए कपमा बुधबार राति तीन खेल हुँदैछन् । राति १ः३० बजे न्यूकासल युनाइटेडले बर्मिङघमसंग, लिभरपुलले प्लाइमाउथसंग र साउथह्याम्पटनले नर्विच सिटीसंग खेल्दैछ ।
