स्पेन । स्पेनिश लिग ला लिगाको शीर्ष स्थानमा रहेको रियाल मड्रिड कोपा देल रे फुटबल प्रतियोगिताबाट बाहिरिएको छ । सेल्टाभिगोसंग समग्रमा ४–३ ले पराजित हुँदै रियालले प्रतियोगिताबाटै हात धुनु परेको हो ।
पहिलो लेगमा घरेलु मैदान सान्टियोगो बर्नाबाउमा २–१ को हार बेहोरेको रियालले दोस्रो लेगमा सेल्टाभिगोको घरेलु मैदान स्टाडियो म्यूनिसिपल डे बालियाडोसमा २–२ को बराबरी खेलेपछि भने समग्रमा हार बेहोर्नु परेको हो ।
रियालले लगातार आत्मघाती गोल गर्दा ४० खेलको अपराजित कीर्तिमान रोकिएपछि निरन्तर खराव प्रदर्शन जारी छ । ४४ औं मिनेटमा डानिलोले आत्मघाती गोल गरेपछि पछाडि परेको रियालले ६२ औं मिनेटमा क्रिष्टियानो रोनाल्डोको गोलबाट बराबरी गर्न सक्यो ।
८५ औं मिनेटमा डानियल वासको गोलबाट पछि परेको रियालले अन्तिम समयमा लुकास भाज्क्वेजको गोलबाट बराबरी गरेको हो । पराजय टारे पनि रियालले चमत्कारिक प्रदर्शन गर्न नसकेपछि प्रशिक्षक जिनेदिन जिदानकोसमेत पतनका दिन सुरु भएको अनुमान गर्न थालिएको छ ।
कोपा देल रे मा एथलेटिको मड्रिड भने अर्को चरणमा पुगेको छ । एथलेटिकोले आइबरलाई समग्रमा ५–२ ले हराएर अर्को चरणमा ठाउँ बनाएको हो । दोस्रो लेग भने २–२ को बराबरीमा सकिएको थियो ।
