स्टामफोर्ड ब्रिज । इङलिश प्रिमियर लिग क्लवहरु चेल्सी, म्यानचेष्टर सिटी, आर्सनल र टोटनह्याम हट्सपर इङलिश एफए कप फुटबलको पाँचौं चरणमा प्रवेश गरेका छन् । लिग लिडर चेल्सीले ब्रेन्टफोर्डमाथि ४–० को फराकिलो जित निकाल्यो ।
चेल्सीलाई जिताउने क्रममा विलियन, पेड्रो रोड्रिग्वेज, ब्रानिस्लाभ इभानोभिच र मिचिले एक एक गोल गरे ।
त्यस्तै म्यानचेष्टर सिटीले क्रिष्टल प्यालेसलाई ३–० ले हरायो । म्यानचेष्टर सिटीलाई जिताउने क्रममा रहिम स्टर्लिङ, लेरोए सान र याया टुरेले एक एक गोल गरे ।
त्यसैगरी आर्सनलले प्रिमियर क्लव साउथह्याम्पटनमाथि ५–० को शानदार जित हासिल गरेको छ ।
आर्सनलमाथि फराकिलो जित दिलाउने क्रममा थिओ वाल्कोटले ह्याट्रिक गरे भने डयानी वेल्बेकले दुई गोल थपे ।
टोटनह्यामले वाइकम्बे वान्डरर्सलाई ४–३ ले, बर्नलेले ब्रिस्टोल सिटीलाई २–० ले, ब्ल्याकबर्न रोभर्सले ब्ल्याकपुललाई २–० ले, मिडिल्सब्रोले एक्रिंगटनलाई १–० ले तथा अक्सफोर्डले न्यूकासललाई ३–० ले हरायो ।
प्रिमियर अधिकांश क्लवहरु पाँचौं चरणमा पुग्दा लिभरपुल भने चौथो चरणबाटै बाहिरिएको छ । लिभरपुललाई वुल्भरह्याम्पन वान्डरर्सले २–१ ले हरायो ।
