सान्टियोगो बर्नाबेउ । स्पेनिश फुटबल लिग ला लिगामा रियाल मड्रिडले शीर्ष स्थानलाई अझ मजबुद बनाएको छ । दोस्रो स्थानको दावेदार क्लव बार्सिलोनाले बराबरी खेलेसंगै रियाल मड्रिडले अग्रतालाई अझ फराकिलो बनाएको हो ।
आइतबार राति भएका खेलमा बार्सिलोनाले रियाल बेटिससंग १–१ को बराबरी खेल्यो । लुइस सुवारेजले अन्तिम समयमा गरेको गोलले बार्सिलोना हारबाटसमेत बचेको हो ।
यता रियालले आफ्नो १९ औं खेलमा रियाल सोसिडाडलाई ३–० ले हरायो । घरेलु मैदानमा खेलेको रियाल मड्रिडले रियाल डर्बी भिडन्तमा सफलता हासिल गर्ने क्रममा माटेओ कोभासिक, क्रिष्टियानो रोनाल्डो र अल्भारो मोराटाले एक एक गोल गरे ।
सोसिडाडका मार्टिनेजले दोहोरो पहेंलो कार्ड खाँदा पछिल्लो १६ मिनेट सोसिडाड १० जनामा सिमित भएर खेलेको थियो ।
लिगका अन्य खेलमा स्पानियोलले सेभियालाई ३–१ ले हरायो । यो हारले भने सेभियाको दोस्रो स्थानमा रहने सपना चकनाचुर भएको छ ।
त्यस्तै एथलेटिक बिलबाओले स्पोर्टिङलाई २–१ ले, सेल्टाभिगोले लेगनेसलाई २–० ले हरायो ।
लिगमा १९ खेलबाट रियाल मड्रिडको ४६ अंक छ भने ४२ अंकको बार्सिलोना दोस्रो स्थानमा छ ।
समान अंकको सेभिया भने गोल अन्तरका आधारमा तेस्रो स्थानमा नै रहेको छ ।
