स्वास्थ्य संस्थामै खानेपानी र शौचालय छैन, कसरी भइएला स्वस्थ ?

प्रकाशित मिति : २०७३ माघ १७ सोमबार

काठमाडौं । नेपालको २० प्रतिशत स्वास्थ्य संस्थामा अझै पनि सेवाग्राहीका लागि सुरक्षित पानी र शौचालयको राम्रो प्रवन्ध नभएको जनाइएको छ । सोमबार सार्वजनिक भएको स्वास्थ्य संस्था सर्वेक्षण प्रतिवेदनले खानेपानी र शौचालय सम्बन्धी भौतिक पूर्वाधार भए पनि २० प्रतिशत स्वास्थ्य संस्थामा अझै पनि सेवाग्राहीका लागि त्यो प्रयोग गर्न योग्य नभएको जनाएको हो ।

स्वास्थ्य मन्त्रालयका जनसङ्ख्या प्रशासन, अनुगमन तथा मूल्याङ्कन महाशाखाका निर्देशक डा. दीपेन्द्ररमण सिंहले मन्त्रालयले सन् २०१५ मा गरेको नेपाल स्वास्थ्य संस्था सर्वेक्षण प्रतिवेदन सार्वजनिक गरे । नेपालभरिका ९६३ वटा स्वास्थ्य संस्थामा गरिएको सर्वेक्षणमा बाल रोग, गर्भवती सेवा लिएका महिला, परिवार नियोजनसम्बन्धी परामर्श र जाँच अवलोकन गर्ने प्रोटोकललाई पनि सर्वेक्षणको विषयवस्तु बनाइएको थियो ।

सर्वेक्षणले ५० प्रतिशतभन्दा बढी स्वास्थ्य संस्थामा नियमित विद्युत् सेवा उपलब्ध नभएको र २० प्रतिशतमा मात्र सञ्चारका उपकरण रहेको औल्याइएको स्वास्थ्य सेवा विभागका मुक्तिनाथ खनालले बताए । उनले १० स्वास्थ्य संस्थामध्ये एउटामा मात्र सबै आधारभूत सुविधा पाइएको पनि जानकारी दिनुभयो । अधिकांश स्वास्थ्य संस्थामा अत्यावश्यक औषधि र न्यूनतम उपकरण जस्तै ज्वरो नाप्ने थर्मामिटर पनि नभएको पाइएको प्रतिवेदनमा उल्लेख छ । रासस

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ