काठमाडौं। भौतिक पूर्वाधार तथा यातायातमन्त्री रमेश लेखकले एक/दुईभित्रै निर्वाचन आयोगलाई चुनावको तयारी गर्न सरकारले पत्र पठाउने स्पष्ट पारेका छन्। बुधबार रिपोर्टर्स क्लब नेपालले आयोजना गरेको साक्षात्कारमा बोल्दै मन्त्री लेखकले भने,‘सरकार निर्वाचनको वातावरण बनाउन गम्भिर रुपमा लागिपरिरहेको छ, कानूनी प्रवन्ध मिलाउन ऐन तथा कानूनहरु संसदबाट कतिपय पारित भैसकेका छन्, भने कतिपय पारित हुने क्रममा छन्, निर्वाचन आयोगलाई सरकारले केही दिनभित्रै औपचारिक रुपमै तयारीको आग्रह गर्छ।’
मन्त्री लेखकले निर्वाचनको लागि राजनीतिक वातावरण बनाउनुपर्ने भएकोले सरकारले अहिले त्यसको लागि पनि विशेष पहलकदमी लिईरहेको जनाए। उनले भने,‘सबै राजनीतिक दलहरुसँग सरकारले परामर्श गरिरहेको छ, वातावरण बनाउने कुरामा हामी गम्भिर छौं।’उनले संविधान कार्यान्वयनको लागि पनि निर्धारित मितिभित्रै तीन वटै तहको निर्वाचन गर्नुपर्ने आवश्यकत्ता औंल्याउँदै त्यसको लागि संविधान संशोधनमार्फत सबैलाई संविधानको स्विकार्यता बढाउनुपर्ने भएकोले सरकारले संसदमा संविधान संशोधन प्रस्ताव टेबुल गरेको जिकिर गरे।
उनले अघि भने,‘यो संविधान मेरोपनि संविधान हो भनेर सबैको अपनत्व महशुस गराउनको लागि नै संशोधन प्रस्ताव ल्याईएको हो, यो प्रस्ताव पास गर्ने वा छलफल गर्ने कि नगर्ने भन्नेबारेमा सम्पूर्ण अधिकार व्यवस्थापिका–संसदलाई हुन्छ।’ मन्त्री लेखकले विद्येयक संसदमा छलफल गरेर पारित गर्नुपर्ने समेत धारणा राखे। उनले भने,‘संशोधन विद्येयकमा उल्लेख गरिएका विषयहरु पहिल्यै नै सहमति भएका विषयहरु हुन्, यसलाई पारित गराउनको लागि वा निश्कर्षमा पुर्याउनको लागि हामी लागिपरिरहेका छौं।’
त्यस्तै उनले मेलम्ची खानेपानी परियोजनाको काम भैरहेकोले काठमाडौं उपत्यका लगायत अन्य ठाउँमा सडक समस्या देखा परेको स्विकार गर्दै भने,‘मेलम्चीको खानेपानी ल्याउनको लागि अहिले बाटोहरु खनिएका छन्, त्यसैले केही समस्याहरु देखा परेका छन्, यसमा हामी निकै चिन्तित छौं कि सर्वसाधारणहरुलाई ठूलो समस्या परेको छ, तर प्राविधिक विषय भएकोले यसलाई हल गर्न थोरै ढिलाई भएको हो, तर हामी गम्भिर भएर लागेका छौं।’
