हमासले शव फिर्ता गर्न ढिलाइ गरेसँगै आपतकालीन सहायता आधा कटौती गर्ने इजरायलको निर्णय
हाम्रा कुरा
प्रकाशित २०८२ असोज २९ बुधबार
2.6k
Shares
काठमाडौँ । इजरायलले गाजाबाट थप चार मृत बन्धकका शव प्राप्त गरेको छ । यसपछि हमासले शव फिर्ता गर्न ढिलाइ गरिरहेको भन्दै, इजरायली सैन्य निकायले गाजामा आपतकालीन सहायता आधा कटौती गर्ने निर्णय गरेको छ ।
शवहरू राष्ट्रिय फरेन्सिक मेडिसिन केन्द्रमा लैजाने तयारी भैरहेको छ, जहाँ तिनीहरूको पहिचान गरी परिवारलाई जानकारी गराइनेछ ।
यो घटनाक्रम हामास र इजरायलबीच कायम भएको शान्ति सम्झौताका लागि ठूलो चुनौती बनेको छ ।
सम्झौता अनुसार, बन्धकलाई ७२ घण्टाभित्र मुक्त गर्नुपर्ने थियो, तर अहिलेसम्म मृतकका शवहरू निकै कम मात्र फिर्ता भएकोले बन्धकका परिवारमा निराशा व्याप्त छ ।
हमासले गाजामा भएका विनाशका कारण शव खोज्न कठिनाइ भएको बताएको छ ।
यसैबीच, युएन र अमेरिकी अधिकारीलाई पनि गाजामा सहायता कटौतीको विषयमा जानकारी दिइएको छ ।
इजरायली प्रधानमन्त्री बेन्जामिन नेतान्याहूले बन्धक फिर्ता र शव हस्तान्तरण प्रक्रियालाई तीव्र बनाउन दबाब दिइरहेका छन् ।
गाजा युद्धमा अहिलेसम्म ६७ हजार ६०० भन्दा बढी प्यालेस्टिनी मारिएका छन् , जसमा धेरै महिला र बालबालिका छन् । एजेन्सी
