इजरायलको शक्तिशाली मजदुर युनियन ‘हिस्टाड्रुट’ माथि गम्भीर भ्रष्टाचारको आरोप
अध्यक्ष डेभिडसहित दर्जनौं पक्राउ
हाम्रा कुरा
प्रकाशित २०८२ कार्तिक १८ मंगलबार
2.1k
Shares
काठमाडौँ। इजरायली प्रहरीले देशको सबैभन्दा मुख्य मजदुर युनियन हिस्टाड्रुट माथि शङ्कास्पद भ्रष्टाचारको अनुसन्धानका क्रममा सोमबार अध्यक्षसहित दर्जनौं वरिष्ठ अधिकारी र स्थानीय व्यक्तित्वहरूलाई पक्राउ गरेको छ। सन् १९२० मा स्थापित र आठ लाखभन्दा बढी सदस्य रहेको यो शक्तिशाली युनियनले इजरायली समाज र राजनीतिमा महत्त्वपूर्ण प्रभाव राख्दछ।
इजरायल प्रहरीको ‘लाहव ४३३ नेशनल फ्राएड इन्भेस्टिगेसन युनिट’ का गुप्तचरहरूले घूसखोरी, धोखाधडी र विश्वासघात, सम्पत्ति शुद्धिकरण तथा कर छली गरेको आशङ्कामा दर्जनौं संदिग्धहरूलाई हिरासतमा लिएका हुन्।
प्रहरीको विज्ञप्तिअनुसार, विगत दुई वर्षदेखि गोप्य रूपमा भइरहेको अनुसन्धानले हिस्टाड्रुटभित्रका वरिष्ठ अधिकारी, स्थानीय अधिकारी र सरकारी कम्पनीका व्यक्तिहरूमाथि केन्द्रित छ। उनीहरूले आफ्नो व्यक्तिगत हित र वित्तीय लाभका लागि व्यापारिक व्यक्तित्वहरूबाट घूस र फाइदा लिएको आशङ्का गरिएको छ।
इजरायली मिडियाले हिस्टाड्रुटका अध्यक्ष अर्नोन बार–डेभिड लाई पनि अनुसन्धानका लागि पक्राउ गरिएको जनाएका छन्। बार–डेभिडले सन् २०२३ को मार्चमा प्रधानमन्त्री बेन्जामिन नेतन्याहूको नीतिको विरोध गर्दै आम हड्तालको आह्वान गरेका थिए र पछि गाजामा बन्धकहरूको रिहाइका लागि सम्झौता गर्न सरकारलाई दबाब दिन हडतालको चेतावनी दोहोर्याएका थिए।
गिरफ्तारीको जवाफ दिँदै हिस्टाड्रुटले आफ्ना कर्मचारीहरू निर्दोष हुनेमा विश्वस्त रहेको जनाएको छ। युनियनले जारी गरेको विज्ञप्तिमा भनिएको छ, “हामी अधिकारीहरूलाई सहयोग गरिरहेका छौँ। सार्वजनिक सेवामा हिस्टाड्रुटको गतिविधि सामान्य रूपमा जारी छ।”
नेतन्याहूको लिकुड पार्टीका सदस्यसमेत रहनुभएका दक्षिणी शहर किरात गाटका मेयर केफिर स्विसाले पनि पक्राउ परेपछि प्रहरीले आफूसँग सोधपुछ गरिरहेको बताएका छन्।
