नेपाल र भारतका मुस्लिम कविहरुको सम्मेलनमा प्रधानमन्त्री

प्रकाशित मिति : २०७३ माघ २९ शनिबार

रौतहट । प्रधानमन्त्री पुष्पकमल दाहाल नेपाल र भारतका मुस्लिम कविहरुको संयुक्त सम्मेलनमा सहभागि भएका छन् । शनिबार दिउँसो रौतहटको जिंगहवामा आयोजित नेपाल—भारत मुशायरा (कवि सम्मेलन) लाई प्रधानमन्त्रीले सम्बोधन गरे ।

सम्मेलनमा प्रधानमन्त्री दाहालले भने, ‘तपाईहरुको यो सम्मेलन निकै दुरगामी महत्वको छ । यसलाई मैले दुरगामी महत्व र रणनीतिक कार्यक्रमका रुपमा लिएको छु । यो सम्मेलनले नेपाल र भारतबीचको सम्बन्ध सुदृढीकरणमा विशेष महत्व राख्नेछ । कविता र सिर्जनाका माध्यमद्धारा मुस्लिम समुदायको पहिचान र अधिकार स्थापित गर्ने तपाईहरुको अभियानमा सफलता मिलोस्, शुभकामना छ ।’

आफू पहिचान र अधिकारका निम्ति अनवरत संघर्षमा रहेको बताउँदै प्रधानमन्त्री दाहालले थपे, ‘म सबै जाति, भाषा, कला, संस्कृति र समुदायको पहिचान र अधिकारको पक्षमा छु । हिमाल, पहाड र मधेशबीच राष्ट्रिय एकताको पक्षमा छु । मेरै नेतृत्वमा जनयुद्ध भयो, उत्पीडितहरुको अधिकारको संघर्ष भयो । अहिले नयाँ संविधानले उत्पीडितहरुको पहिचान र अधिकारलाई संस्थागत गरेको छ । बाँकी अधिकार संविधान संशोधनको माध्यमद्धारा प्राप्त गर्दै जाने बाटो खुलेको छ ।’

नयाँ संविधानमा मुस्लिम अधिकार संस्थागत भएको बताउँदै प्रधानमन्त्रीले भने,  ‘संविधानमा मुस्लिम आयोगको व्यवस्था छ, यो संवैधानिक आयोग हो । अब मुस्लिमहरुका अधिकार पनि संस्थागत हुँदै जानेछन् । सिर्जनाका माध्यमबाट आफ्नो समुदायको अधिकार र जागरणका निम्ति तपाईहरुले थाल्नुभएको अभियान प्रशंसनीय छ ।’

कार्यक्रममा नेपाल र भारतका ३६ जना मुस्लिम कविहरुले भाग लिनेछन् । एक दिने कवि सम्मेलनमा मुस्लिम समुदायको भाषा, कला, संस्कृति, ऐतिहासिकता, पहिचान र अधिकारसँग सम्बन्धित कविताहरु प्रस्तुत हुने बताइएको छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ