पर्पला फागुन तेस्रो साता सार्वजनिक हुँदै

प्रकाशित मिति : २०७३ फाल्गुण ३ मंगलबार
काठमाडौं ।  युवाहरूको जीवन भोगाइ, सोच, खोज, चिन्तन र प्रेम विषयमा लेखिएको युवा लेखक मिलन सङ्ग्रौलाको पहिलो उपन्यास पर्पला यही फागुन तेस्रो साता सार्वजनिक हुनेभएको छ । नेपाली साहित्यमा युवा केन्द्रित विषयवस्तुमा कलम चलाइरहेका सङ्ग्रौलाले युवायुवतीको कलेज जीवन, त्यस बखत युवायुवतीमा देखिने प्रेमाकर्षण र त्यसबाट तत्कालीन जीवनमा पर्ने प्रभाव र पारिवारिक तथा सामाजिक मूल्यमान्यतालाई उपन्यासमा उतारेका छन् ।
 
मोफसलबाट काठमाडौँ आई आधुनिक समाजसँग पौठेजोरी खेल्दै प्रेममा पर्ने बबिन, स्कूलकी सहपाठीसँगको आकर्षणमा जीवन आहूति दिन पछि नपर्ने दिव्य र रहस्यमयी पात्रा पर्पलाबीचको त्रिकोणात्मक प्रेमलाई उपन्यासको विषय बनाइएको छ । सरल, सरस र शिष्ट भाषामा एक युवाले युवाहरूका निम्ति लेखेको पुस्तक हो, पर्पला । लेखक सङ्ग्रौला भन्छन्, “उपन्यासमा युवाबीचको प्रेम, यथार्थ र सामाजिक मनोविज्ञानलाई मिहीनरुपमा प्रयोग गर्ने कोसिस गरेको छु । पाठकहरूले पक्कै पनि माया गर्नु हुनेछ ।” सङ्ग्रौलाले तीन वर्ष लगाएर लेखेको उपन्यास पर्पलालाई बुक–हिल पब्लिकेसनले बजारमा ल्याउन लागेको हो ।
 
बुक–हिलका प्रबन्धक पवन आचार्य भन्छन्, “पर्पलाको विषयवस्तु र चित्ताकर्षक लेखाइ–शैलीका कारण यो उपन्यास युवा मात्रै होइन, जुनसुकै उमेरवयका पाठकले पनि मन पराउनुहुनेछ ।” उपन्यासको आवरणमा नायिका स्वस्तिमा खड्कालाई पर्पलाको रुपमा प्रस्तुत गरिएको छ । आजै प्रेस वक्तव्यसँगै पुस्तकको आवरण र बुक–हिलको अफिसियल युट्युव च्यानलमार्फत् श्रव्यदृश्य प्रचार सामग्री औपचारिकरुपमा सार्वजनिक गरिएको छ, जसमा स्वराङ्कन चर्चित रेडियो प्रस्तोता अच्यूत घिमिरे ‘बुलबुल’ले गरेका छन् ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ