काठमाडौँ । इरानले संयुक्त राज्य अमेरिकासँगको भविष्यको वार्ताका लागि प्रारम्भिक रूपरेखा (फ्रेमवर्क) तयार गरिरहेको छ। इरानका उच्च कूटनीतिज्ञ अब्बास अराघचीले बुधबार संयुक्त राष्ट्रसङ्घको आणविक निगरानी संस्था (आइएइए) का प्रमुख राफेल ग्रोसीसँगको टेलिफोन वार्ताका क्रममा यस्तो जानकारी दिएका हुन्।

इरानी विदेश मन्त्रालयका अनुसार, अराघचीले भविष्यको वार्तालाई सुसङ्गत ढङ्गले अगाडि बढाउन एउटा निश्चित मस्यौदा तयार पार्नमा तेहरानको ध्यान केन्द्रित रहेको बताएका छन्। ओमानको मध्यस्थतामा जेनेभामा इरान र अमेरिकाबीच दोस्रो चरणको वार्ता सम्पन्न भएको भोलिपल्टै यो फोन संवाद भएको हो।

अराघचीले तेहरानले सम्भावित द्वन्द्व टार्नका लागि सम्झौताका ‘मार्गदर्शक सिद्धान्तहरू’ मा सहमति जनाएको बताए पनि वाशिङ्गटनले भने अझै पूर्ण रूपमा विश्वस्त नभएको सङ्केत दिएको छ। अमेरिकी उपराष्ट्रपति जेडी भान्सले तेहरानले अझै वाशिङ्गटनका सबै ‘सीमा सर्त’ हरू स्वीकार गरिनसकेको स्पष्ट पारेका छन्। त्यस्तै, अमेरिकी ऊर्जा मन्त्री क्रिस राइटले पनि इरानलाई कुनै पनि हालतमा आणविक हतियार प्राप्त गर्नबाट रोक्ने अमेरिकाको दृढता दोहोर्‍याएका छन्।

भियनामा बुधबार आइएइएका लागि इरानी प्रतिनिधि रेजा नजाफीले ग्रोसीका साथै रुस र चीनका राजदूतहरूसँग संयुक्त बैठक गरेका छन्। यो बैठकमा आइएइएको आगामी 'बोर्ड अफ गभर्नर्स' बैठक र इरानको आणविक कार्यक्रमका पछिल्ला घटनाक्रमबारे छलफल भएको थियो।

यद्यपि, आइएइए र इरानबीचको सम्बन्ध भने पछिल्लो समय केही जटिल बनेको छ। तेहरानले एजेन्सीसँगको केही सहयोग निलम्बन गरेको छ भने जुन महिनामा इजरायल र अमेरिकाले बमबारी गरेका स्थलहरूमा निरीक्षकहरूलाई प्रवेश अनुमति दिएको छैन। संयुक्त राष्ट्रसङ्घीय निकायले आफूमाथि भएको आक्रमणको निन्दा नगरेको र पूर्वाग्रही बनेको आरोप इरानले लगाएको छ।

क्षेत्रीय तनाव र अमेरिकी सैन्य परिचालनका बीच इरानमा हुन सक्ने सम्भावित सैन्य हस्तक्षेपलाई रोक्न अहिले कूटनीतिक प्रयासहरूले तीव्रता पाएका छन्। यो वार्ताको मस्यौदाले आगामी दिनमा इरान र पश्चिमा मुलुकबीचको आणविक विवादलाई कुन दिशा दिनेछ भन्ने चासोका साथ हेरिएको छ।