इत्तिहाद स्टेडियम । इङलिश प्रिमियर लिग क्लव म्यान्चेस्टर सिटी इङलिश घरेलु प्रतियोगिता एफए कप फुटबलको क्वार्टरफाइनलमा प्रवेश गरेको छ । बुधबार राति घरेलु मैदान इत्तिहाद स्टेडियममा भएको पाँचौं चरणको रि प्ले खेलमा म्यान्चेस्टर सिटीले च्याम्पियनसिप क्लव हडर्सफिल्ड टाउनलाई ५–१ को विशाल अन्तरले हरायो ।
सर्जियो अगुएरोले दुई गोल तथा लेरोए साने, पाब्लो जाब्लेटा र केहिचि इहिनाचोले एक एक गोल गरे । यसअघिको खेल गोलरहित बराबरीमा सकिएपछि रि प्ले भएको हो ।
खेलमा ह्यारी बनले गोल गर्दै टाउनलाई अग्रता दिलाएर पहिलो खेलको झझल्को दिए । तर बनले गोल गरे पनि अरु खेलाडी चम्किन नसक्दा टाउन निरन्तर ‘डाउन’ भयो ।
अब म्यान्चेस्टर सिटीले क्वार्टरफाइनलमा प्रिमियर लिग प्रतिद्वन्द्वी मिडिल्सब्रोसंग खेल्नेछ ।
