क्याम्प नोउ । स्पेनिश क्लव बार्सिलोनाले फुटबलमा असम्भव केही छैन भन्ने प्रमाणित गरेको छ । च्याम्पियन्स लिग फुटबलको प्रिक्वार्टरफाइनल पहिलो लेगको खेलमा ४–० ले पराजित भएको बार्सिलोनाले दोस्रो लेगको खेलमा ६–१ को जित हासिल गर्दै क्वार्टरफाइनलमा ठाउँ पक्का गरेको हो ।
पहिलो लेगमा फ्रेन्च क्लव पेरिस सेन्ट जर्मेन पीएसजीले घरेलु मैदानमा उत्कष्ट प्रदर्शन गरे पनि दोस्रो लेगको खेलमा बार्सिलोनाले घरेलु मैदानमा जादूमय प्रदर्शन गरेपछि बार्सिलोना यतिबेला विश्व फुटबलमा चर्चामा आएको हो ।
बार्सिलोनालाई जिताउने क्रममा ब्राजिलियन स्टार नेमारले ८८ औं र ९० औं मिनेटमा दुई गोल गरेपछि बार्सिलोना एकाएक चर्चामा आएको हो । त्यस्तै इन्जुरी समयको अन्तिम सेकेन्डमा सर्जी रोबर्टोले गोल गर्दै बार्सिलोनालाई जिताए ।
यसअघि तेस्रो मिनेटमा लुइस सुवारेजले, ४० औं मिनेटमा लेभिन कुर्जावाले आत्मघाती, ५० औं मिनेटमा लिओनल मेसीले पेनाल्टीमार्फत गोल गरेका थिए । तनावपूर्ण खेलको ६२ औं मिनेटमा एडिसन काभानीले पीएसजीलाई सान्त्वना गोल दिलाएका थिए ।
यो जितसंगै बार्सिलोनाले समग्रमा ६–५ को जित निकाल्दै क्वार्टरफाइनलमा ठाउँ बनाएको हो ।
त्यस्तै अर्को खेलमा विजयी हुँदै जर्मन क्लव बोरुसिया डर्टमण्ड पनि क्वार्टरफाइनलमा पुगेको छ । बोरुसियाले बेनेफिकालाई समग्रमा ४–१ ले हराएको हो । पहिलो लेगमा बेनेफिका १–० ले विजयी भएकामा दोस्रो लेगमा बोरुसिया ४–० ले विजयी भयो ।
