किंग पावर स्टेडियम । इङलिश प्रिमियर लिगको डिफेन्डिङ च्याम्पियन लेष्टर सिटीले पहिलो सहभागीतामै क्वार्टरफाइनलको यात्रा तय गर्ने कीर्तिमान राख्न सफल भएको छ । लिग विजेताको हैसियतले च्याम्पियन्स लिग खेल्ने मौका पाएको लेष्टरले राउन्ड अफ सिक्सटिनमा स्पेनिश क्लव सेभियालाई एग्रिगेटमा ३–२ ले हराउँदै अन्तिम आठमा पुग्न सफल भएको हो ।
पहिलो लेगमा २–१ ले पराजित भए पनि दोस्रो लेगमा भने घरेलु मैदान किंग पावर स्टेडियममा मंगलबार राति २–० को जित निकाल्दै लेष्टरले क्वार्टरफाइनलमा आफूलाई उभ्याएको हो ।
लेष्टरलाई जिताउन को जितमा वेस मोर्गान र मार्क अल्ब्राइटनले एक–एक गोल गरे । २–० ले पछि परेको अवस्थामा सेभियाका समिर नास्रीले दोहोरो पहेंलो कार्ड खाँदै मैदानबाट बाहिरिएपछि लेष्टर ढुक्क भएको थियो ।
तर सेभियाकै पनि भाग्य कमजोर रहेको स्पष्ट हुन्छ । ८० औं मिनेटमा पेनाल्टी हान्ने अवसर पाए पनि स्टेभन जोन्जी असफल रहे । यो जितले भने लेष्टर क्रेज बाँकी नै रहेको प्रमाणित गरेको छ ।
च्याम्पियन्स लिगअन्तर्गतको मंगलबार रातिको अर्को खेलमा इटालियन क्लव युभेन्टसले पोर्चुगिच क्लव एफसी पोर्टोलाई १–० ले हरायो । खेलमा युभेन्टसलाई विजयी गराउन पाउलो डिबालाले पेनाल्टीमा निर्णायक गोल गरे ।
पहिलो लेगमा २–० ले विजयी भएको युभेन्टस एग्रिगेटमा ३–० को परिणाम निकाल्दै क्वार्टरफाइनलमा पुगेको छ ।
च्याम्पियन्स लिग फुटबलमा बुधबार राति दुई खेल हुँदैछन् । स्पेनिश क्लव एथलेटिको मड्रिडले जर्मन क्लव बायर लिभरकुजेनसंग अनि फ्रेन्च क्लव मोनाकोले इङलिश क्लव म्यानचेष्टर सिटीसंग खेल्नेछ । दुवै खेल राति १ः३० बजे सुरु हुनेछन् ।
