लण्डन । इङलिश प्रिमियर लिग फुटबलमा चेल्सीको विजयी यात्रा कायमै रहेको छ । चेल्सीले आफ्नो २८ औं खेलमा स्टोक सिटीमाथि २–१ को जित निकाल्यो । १३ मिनेटमै विलियनको गोलबाट अग्रता लिएको चेल्सीले ३८ औं मिनेटमा जोनाथन वाल्टरले पेनाल्टीमा गोल गरेपछि बराबरीमा आउन वाध्य भयो ।
तर अन्तिम तिर अर्थात् ८७ औं मिनेटमा गेरी काहिलले गोल गरेपछि चेल्सी ढुक्क भयो । स्टोकका फिल बार्डसलीले दोहोरो पहेंलो कार्ड खाँदा इन्जुरी समयमा थप पीडा भोग्यो ।
लिगको अर्को खेलमा आर्सनलले भने पराजय भोगेको छ । आर्सनललाई वेष्टब्रोमविच आल्बियनले ३–१ ले हराएको हो । यो हारले भने आर्सनललाई निकै तल पुर्याएको छ ।
अन्य खेलमा क्रिष्टल प्यालेसले वाटफोर्डलाई १–० ले, एभर्टनले हल सिटीलााई ४–० ले, लेस्टर सिटीले वेष्टह्याम युनाइटेडलाई ३–२ ले तथा एएफसी बर्नमाउथले स्वान्सी सिटीलाई २–० ले हरायो ।
सन्डरल्याण्ड र बर्नलीले भने गोलरहित बराबरी खेलेका छन् । लिगमा २८ खेलबाट ६९ अंकको चेल्सी शीर्ष स्थानमा अनवरत कायमै छ ।
एक खेल कम खेलेको दोस्रो स्थानको टोटनह्याम र तेस्रो स्थानको म्यानचेष्टर सिटीको समान ५६–५६ अंक छ । लिभरपुलको ५५ तथा आर्सनलको ५० अंकमात्र छ ।
