इत्तेहाद स्टेडियम । इङलिश प्रिमियर लिग फुटबलको उपाधि दौडबाट लगभग बाहिरिएका म्यानचेष्टर सिटी र लिभरपुलले बराबरी खेलेका छन् । म्यानचेष्टरको मैदानमा भएको खेलमा १–१ को बराबरी भएको हो ।
खेलको ५१ औं मिनेटमा जेम्स मिल्नरले पेनाल्टीमार्फत गोल गर्दै लिभरपुललाई अग्रता दिलाए । ६९ औं मिनेटमा सर्जिओ अगुएरोले गोल गर्दै म्यानचेष्टर सिटीलाई बराबरीमा ल्याए ।
घरेलु मैदानमै बराबरीमा रोकिदा भने म्यानचेष्टर सिटीलाई झड्का लागेको छ । यही खेलमै म्यानचेष्टर सिटीका याया टौरे, डभिड सिल्भाजस्ता खेलाडीले पहेंलो कार्ड खाँदा म्यानचेष्टर सिटीले अब झन् सचेत भएर खेल्नुपर्ने देखिएको छ ।
त्यस्तै अर्को खेलमा म्यानचेष्टर युनाइटेड भने विजयी भयो । युनाइटेडले मिडिल्सब्रोलाई उसकै मैदानमा ३–१ ले पराजित गर्यो । म्यानचेष्टरलाई जिताउन मिारोउने फेलियानी, जेसी लिंगार्ड र एन्टोनियो भ्यालेन्सियाले एक एक गोल गरे ।
टोटनह्याम हट्सपर भने माथि उक्लिएको छ । टोटनह्यामले साउथह्याम्पटनलाई २–१ ले हराउँदै लिग तालिकामा आफूलाई स्पष्ट दोस्रो स्थानमा ल्याएको छ ।
लिगमा २८ खेलबाट ६९ अंकसहित चेल्सी शीर्ष स्थानमा रहेको छ भने टोटनह्यामको ५९ अंक छ । म्यानचेष्टर सिटी ५७ अंकसहित तेस्रो तथा लिभरपुल ५६ अंकबाट चौथो स्थानमा छ ।
म्यानचेष्टर युनाइटेडलाई आफूलाई सुधार गर्दै ५२ अंकसहित पाँचौं स्थानमा पुग्न सफल भएको छ ।
