मोन्टेभिडियो । विश्वकप छनोट फुटबलमा पाँच पटकको विश्वकप विजेता ब्राजिलले युरुग्वेमाथि शानदार जित हासिल गरेको छ । शुक्रबार बिहान युरुग्वेको मैदान मोन्टेभिडियोमा भएको खेलमा ब्राजिल ४–१ ले विजयी भएको हो ।
दक्षिण अमेरिकी छनोट समूहमा ब्राजिललाई जिताउने क्रममा पाउलिन्होले ह्याट्रिक गरे । त्यस्तै ब्राजिल कप्तान नेइमारले एक गोल जोडे ।
यसअघि खेलको ८ मिनेटमै युरुग्वेका खेलाडी एडिसन काभानीले पेनाल्टीमार्फत गोल गरेका थिए ।
यो जितसंगै शीर्ष स्थानको ब्राजिलको १३ खेलबाट ३० अंक भएको छ । २३ अंकको युरुग्वे दोस्रो स्थानमै छ ।
यता अर्जेन्टिना २२ अंकका साथ तेस्रो स्थानमा छ । अर्जेन्टिनाले शुक्रबार बिहान भएको खेलमा चिलीलाई १–० ले हरायो ।
अर्जेन्टिनालाई जिताउन लिओनल मेसीले पेनाल्टीमार्फत १६ मिनेटमै निर्णायक गोल गरे ।
अन्य खेलमा कोलम्बियाले बोलिभियालाई १–० ले, पाराग्वेले इक्वेडरलाई २–१ ले हराउँदा भेनेजुएला र पेरुले २–२ को बराबरी खेले ।
