किसानको संघर्षको कथा ‘नाङ्लोदेखि हाइड्रोसम्म’ बजारमा

प्रकाशित मिति : २०७३ चैत १३ आइतबार
काठमाडौं । काठमाडौंमा जन्मिएर कृषि पेशा अंगालेर हाइड्रोपावर संचालन गर्ने हैसियतमा पुग्न सफल एक कृषकको जीवनी समेटिएको पुस्तक ‘नाङ्लोदेखि हाइड्रोसम्म’ बजारमा आएको छ । पुस्तकको स्वास्थ्यमन्त्री गगनकुमार थापा, पूर्व मन्त्री एवं पूर्व सचिव शंकरप्रसाद कोइराला लगायतले राजधानीमा भएको कार्यक्रममा संयुक्त रुपले विमोचन गरे । 
 
हिरारत्न चलचित्र मन्दिरले प्रकाशन गरेको पुस्तकमा एक परिश्रमी उद्यमी स्वर्गीय रत्नबहादुर तण्डुकारको जीवनी समेटिएको छ । आफैले खेती गरेर उब्जाएको सामग्रीलाई नाङ्लोमा राखेर बेच्दादेखि तण्डुकार कसरी फर्निचर उद्योगको मालिक बने अनि हिरारत्न चलचित्र हल खोल्नेदेखि हाइड्रोपावर संचालन गर्नेसम्मको हैसियतमा पुगे भनी पुस्तकमा यथार्थ उतारिएको छ । 
 
जीवनमा सधै अर्काको भलोमात्र गर्नुपर्छ भन्ने सोच राख्ने तण्डुकार जीवनभर अर्काको बिस्तारमा त सुतेनन् नै सबैलाई तपाईभन्दा तलको आदरभावसमेत प्रकट गरेनन् । हीरादेवी तण्डुकारले लेखेको पुस्तकबारे बोल्दै स्वास्थ्यमन्त्री थापाले जीवनमा केही गर्छु भन्ने भावना भएका व्यक्तिले यो पुस्तक पढ्नै पर्नेमा जोड दिए । 
 
त्यस्तै पूर्वमन्त्री एवं पूर्व सचिव शंकरप्रसाद कोइरालाले आफ्नो कर्मचारी जीवनमा तण्डुकारजस्तो इमानदार उद्यमी नदेखेको भन्दै इमानदारीपूर्वक गरेको कामबाट पनि धनी बन्न सकिने स्पष्ट पारे । सो पुस्तक विमोचन एवं एम्बुलेन्स हस्तान्तरण कार्यक्रममा तण्डुकार परिवारले नेपाल एम्बुलेन्स सेवालाई एउटा एम्बुलेन्स संचालनका लागिसमेत हस्तान्तरण गरेको छ । सो अवसरमा ‘नाङ्लोदेखि हाइड्रोसम्म’ नामक सोमराज पोखरेल लिखित वृत्तचित्रसमेत प्रस्तुत गरिएको थियो । 
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ