स्टामफोर्ड ब्रिज । इङलिश प्रिमियर लिग फुटबलमा चेल्सीले लज्जास्पद हार भोगेको छ । शनिबार राति घरेलु मैदान स्टामफोर्ड ब्रिजमा खेलेको चेल्सी रेलिगेशनबाट बच्न संघर्षरत क्लव क्रिष्टल प्यालेससंग २–१ ले पराजित भएको हो ।
खेलको ५ मिनेटमै सेस फाब्रिगासले गोल गर्दै चेल्सीलाई सुरुआती अग्रता दिलाए । त्यसको ४ मिनेटमै विलफ्राइड जाहाले गोल गरेर क्रिष्टललाई बराबरीमा ल्याए । फेरि त्यसको दुई मिनेटमै क्रिष्टियन बेन्टेकेले गोल गरेर क्रिष्टललाई २–१ ले जिताए ।
बाँकी रहेको ७९ मिनेटमा चेल्सीले आफ्नै मैदानमा त्यो पनि कमजोर क्रिष्टल प्यालेसमाथि गोल फर्काउन नसक्नुले भने फुटबल जगत् नै आश्चर्यमा परेको छ । गोलको बदलामा डिएगो कोष्टा, गेरी काहिल र डेभिड लुइजले पहेंलो कार्ड खाएका थिए ।
४१,४८९ दर्शकलाई निराश पारेको यो खेलमा पराजित भएसंगै उपाधिको एकमात्र दावेदार चेल्सीले यस्तै प्रदर्शन गर्ने हो भने उपाधि पनि गुमाउन बेर नलाग्ने टिप्पणी हुन थालेको छ ।
यो हारपछि चेल्सीको २९ खेलबाट ६९ अंक छ । दोस्रो स्थानको टोटनह्याम हट्सपरको ६२ अंक भएको छ । ७ अंकको मात्र अन्तर गर्ने क्रममा टोटनह्यामले शनिबार रातिको खेलमा बर्नलीलाई २–० ले हरायो ।
त्यस्तै लिभरपुल ३० खेलबाट ५९ अंकसहित तेस्रो स्थानमा उक्लिएको छ । लिभरपुलले शनिबार राति नै एभर्टनलाई घरेलु मैदानमा ३–१ ले हरायो ।
त्यस्तै हल सिटीले वेष्टह्याम युनाइटेडलाई २–१ ले तथा वाट्फोर्डले सन्डरल्याण्डलाई १–० ले हराउँदा साउथह्याम्पटनले बर्नमाउथसंग र म्यानचेष्टर युनाइटेडले वेष्टब्रोमविच आल्बियनसंग गोलरहित बराबरी खेल्यो ।
यो गोलरहित बराबरीले म्यानचेष्टर युनाइटेडका प्रशिक्षक होजे मौरिन्होलाई एक पटक फेरि झड्का लागेको छ । म्यानचेष्टर युनाइटेड २८ खेलबाट ५३ अंकसहित पाँचौं स्थानमा छ ।
यही लयमा जाने हो भने म्यानचेष्टर युनाइटेड शीर्ष चारसम्म रहने सम्भावनासमेत गुम्ने खतरा छ ।
म्यानचेष्टर सिटी २८ खेलबाट ५७ अंकसहित चौथो स्थानमा छ । त्यस्तै २७ खेलबाट आर्सनल ५० अंकसहित छैटौं स्थानमा छ ।
राति ८ः३० बजे आर्सनल र म्यानचेष्टर सिटीबीच महाभिडन्त हुँदैछ । खेल आर्सनलको मैदानमा हुनेछ । त्यस्तै साँझ ६ः१५ बजे स्वान्सी र मिडिल्सब्रो भिड्ने छन् ।
