प्रचण्डको गृहजिल्लामा कुन कुन पाटीका को को छन चुनावी दौडमा ?

भरतपुर महानगरमा चुनावी चर्चा

नारायण अधिकारी, प्रकाशित मिति : २०७३ चैत २२ मंगलबार
चितवन। प्रधानमन्त्री पुष्पकमल दाहालको गृहजिल्ला र नेपाली काँग्रेसका पूर्व सभापति स्व सुशील कोइरालाको निर्वाचन क्षेत्रमा पर्ने भरतपुर महानगरपालिकामा निर्वाचन नजिकिँदै जाँदा चुनावी चहलपहल बढेको छ । 
 
साथै एमाले पोलिटब्युरो सदस्य एवम् पूर्व अर्थमन्त्री सुरेन्द्र पाण्डेको चुनावी क्षेत्र रहेको जिल्ला र राप्रपाका उपाध्यक्ष एवम् मन्त्री विक्रम पाण्डेले निर्वाचन जितेको क्षेत्र नं ५ समेत रहेको महानगरपालिका भएकाले पनि भरतपुरको निर्वाचन चर्चा शिखरमा पुगेको हो । 
 
चितवन क्षेत्र नं ४ को पूरै भूभाग एव्म क्षेत्र नं ३ र ५ को आंशिक भूभागमा पर्ने भरतपुर महानगरपालिकामा एक लाख ५१ हजार मतदाता छन् । पहाडको कविलास गाउँदेखि प्रमुख सहर नारायणगढ हुँदै राप्ती र नारायणी नदीको सङ्गमस्थल गोलाघाटसम्मको क्षेत्र महानगरपालिकाले ओगटेको छ । 
 
महानगरमा परेको चितवन क्षेत्र नं ४ मा विगतका निर्वाचनमा नेपाली काँग्रेसले विजय हासिल गर्दै आएको छ भने आंशिक क्षेत्र पर्ने क्षेत्र नं ३ मा नेकपा (एमाले) र क्षेत्र नं ५ मा राप्रपा एवम् माओवादीले विजय हासिल गर्दै आएका छन् । त्यसैले पनि यो महानगरपालिकामा चारवटै दलको विजयी हुने दाबी भएपनि नेपाली काँग्रेस र नेकपा (एमाले) बीचमा कडा प्रतिस्पर्धा हुने विश्लेषण सुनिन्छ । 
 
भरतपुर महानगरपालिकामा एक नगर अध्यक्ष (मेयर) सहित एक१ सय ५० जनाप्रतिनिधि चयन हुनेछन् । चितवनलाई काँग्रेसले आफ्नो बलियो आधार क्षेत्रका रूपमा लिँदै आएको छ । पूर्वी चितवनमा काँग्रेसको पकड कम भए पनि पश्चिम चितवनमा भने काँग्रेसको प्रभाव बढी छ । सोही कारणले गर्दा पनि काँग्रेसका तत्कालीन सभापति स्व. सुशील कोइरालाले दोस्रो संविधानसभा निर्वाचनमा आफ्नो गृह जिल्ला बाँकेभन्दा पहिला चितवन क्षेत्र नं ४ बाट उम्मेदवारी घोषणा गरेका थिए । 
 
उनले भारी मतका साथ निर्वाचन जितेका थिए। क्षेत्र नं ४ को सबै भूभाग भरतपुर महानगरपालिकाभित्र नै पर्छ । काँग्रेसको प्रभाव क्षेत्र भएका कारण जित्न सक्ने सम्भावना बलियो भएको दाबी गर्दै काँग्रेसबाट आकाङ्क्षी पनि बढी देखिएका छन् । 
 
नेपाली काँग्रेसका सभापति शेरबहादुर देउवा, वरिष्ठ नेता रामचन्द्र पौडेल र कृष्णप्रसाद सिटौला निकटले आ–आफ्नै उम्मेदवारी दाबी गर्दै आएका छन् । त्यसो त तिनै नेताका समर्थक धेरै भएपछि आन्तरिक रुपमै मिलाउन कठिन देखिएको छ । देउवा निकट मिलनबाबु श्रेष्ठ, प्रकाश अधिकारी, पृथ्वीमान गुरुङ, ऋषि पाण्डे, दीर्घमान श्रेष्ठलगायतको दाबी रहेको छ । 
 
वरिष्ठ नेता पौडेल पक्षका प्रा डा सूर्यकान्त घिमिरे, टेकप्रसाद गुरुङ, विजयराज शर्मा भुसाल, शङ्कर कँडेल, राजेश्वर खनालको दाबी छ भने सिटौला निकट दिनेश कोइरालाले पनि दाबी गर्दै आएका छन् । समूहभित्र नै मिलाउन कठिन देखिएको छ । पार्टीमा देखिएको तीन धारले गर्दा मेयरको टिकट कसले पाउने भन्ने विषय टुङ्गो नलागेको काँग्रेसका एक नेताले जानकारी दिए । पार्टीमा मेयर र उपमेयरका विषयमा अहिले कुनै प्रकारको निर्णय नभएको जिल्ला सभापति जीतनारायण श्रेष्ठले बताउनुभयो । सहमतिमै उम्मेदवार चयन हुने उनले दाबी छ । 
 
नेकपा (एमाले)भित्र पनि भरतपुर महानगरपालिकाको मेयरको उम्मेदवार को बन्ने भन्नेमा दौडधुप सुरु भएको छ । 
 
काँग्रेसका प्रभाव क्षेत्र रहेको पश्चिम चितवनसहितको भूभाग समेटेर बनेको भरतपुर महानगरपालिकामा एमालेले काँग्रेसलाई नै आफ्नो प्रमुख प्रतिस्पर्धीका रुपमा उभ्याएको छ । नेकपा (एमाले)मा पनि अध्यक्ष केपी ओली र वरिष्ठ नेता माधवकुमार नेपाल एवम् वामदेव गौतम निकटहरुले लविङ सुरु गरेका छन् । 
 
ओली निकट विजय सुवेदी, देवी ज्ञवाली, डा तिलचन्द्र भट्टराई, पार्वती रावल, कृष्णप्रसाद भुर्तेललगायतको दाबी छ । नेपाल पक्षका तेजेन्द्र खड्का, घनश्याम भट्टराई, अरुणपीडित भण्डारी, कृष्णराज न्यौपानेलगायतको दाबी रहेको छ भने गौतम पक्षका केशवलाल श्रेष्ठ पनि पछिल्लो समय चर्चामा छन् । 
 
प्रधानमन्त्री पुष्पकमल दाहालको घर रहेको भरतपुर महानगरपालिकाभित्र माओवादी केन्द्रका लागि भरतपुर महानगरपालिको मेयर प्रतिष्ठाको विषय बन्दै गएको छ । प्रधानमन्त्री दाहालले चितवन जिल्लाका लागि हालै करोडौँ बजेटको प्याकेज कार्यक्रम ल्याएपछि माओवादी केन्द्रमा अझै बढी उत्साह थपिएको छ ।
 
 यसै क्षेत्रमा अध्यक्ष दाहालले आफ्नो निर्वाचन क्षेत्र बनाउने योजना बनाएकाले पनि माओवादीको मत सुरक्षित गर्न बलियो उम्मेदवार उठाउने माओवादी योजना रहेको छ । केन्द्रबाट महानगरपालिकाको मेयरमा नारायण दाहाल, सूर्य सुवेदी पथिक, घनश्याम दाहाल अविनाश, ऋषि पौडेल, मित्रराज दवाडीको नाम चर्चामा छ । प्रचण्डले चाहेको व्यक्ति नै भरतपुर महानगरपालिकाका लागि माओवादी केन्द्रको उम्मेदवार बन्ने निश्चित छ । 
 
राप्रपाले जिल्ला अध्यक्ष बद्री तिमिल्सिनालाई नै महानगरपालिको मेयरमा पठाउने चर्चा चलेको छ । तिमिल्सिनासँगै भरतपुर महानगरपालिकाका पार्टी प्रमुख विष्णुप्रसाद खरालले पनि मेयरमा उम्मेदवारीको आकाङ्क्षा राखेका छन् । एद्यपि यसै क्षेत्रबाट प्रत्यक्ष निर्वाचित भई मन्त्री एवम् पार्टीका उपाध्यक्ष रहेका विक्रम पाण्डेको चाहना बेगर मेयरको उम्मेदवार हुन सक्ने देखिँदैन । 
 
४३२ दशमलव ९५ वर्ग किमी क्षेत्रफल रहेको भरतपुर महानगरपालिकामा २९ वडा रहेका छन् भने जनसङ्ख्या दुई लाख ८० हजार रहेको छ । मतदाता एक लाख ५१ हजार ६ सय ४१ जना रहेका छन् । महानगरपालिकामा झन्डै ४० प्रतिशत जनजाति बाहुल्य छ । 
 
चितवन जिल्लामा २४ वटा राजनीतिक दलले निर्वाचन कार्यालयमा दल दर्ता गरेका छन् । चितवन जिल्लामा रहेका १६१ वटा मतदानस्थलमध्ये भरतपुर महानगरपालिकामा मात्रै ६५ स्थल रहने जिल्ला निर्वाचन कार्यालयका प्रमुख हरि ढकालले जानकारी दिए । रासस 
 

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ