एमालेको घोषणापत्रमा चुनावी मूल एजेण्डा के हुन्छ ?

यसो भन्छन् भीम रावल

प्रकाशित मिति : २०७३ चैत २२ मंगलबार

काठमाडौं । प्रमुख विपक्षी दल एमालेले आसन्न स्थानीय तहको निर्वाचनमा पनि आफ्नो चुनावी मूल एजेण्डा राष्ट्रियता नै रहने जनाएको छ । एमाले उपाध्यक्ष एवं घोषणापत्र मस्यौदा समिति सदस्य भीम रावलले हाम्राकुरासँग भने, ‘यो मिति भन्दा पनि हामी छिटो भन्दा छिटो घोषणा पत्र तयार पार्छौ । काम धमाधम भइरहेको छ ।’

पार्टी उपाध्यक्ष बामदेव गौतमको संयोजकत्वमा बनेको समितिले राष्ट्रियता, राष्ट्रियहित, दिगो शान्ति, स्वाभीमान र राष्ट्रको सुरक्षालाई बढी जोड दिने रावलको भनाई छ । एमालेले कृषि, पर्यटन, ऊर्जा, औधोगिकरण, यातायात, वन वनस्पिति, खनिजको उपयोग गर्न महत्वपूर्ण एजेण्डाहरु पनि अघि सार्ने उनले बताए ।

उनले भने, ‘मैले छोटकरीमा भने, यी विषयहरुलाई योजनावद्ध र व्यवहारिक ढंगले उठान गरिन्छ ।’ मस्यौदा समितिमा पूर्व अर्थमन्त्री विष्णु पौडेल पनि छन् । यस्तै, उपाध्यक्ष अष्टलक्ष्मी शाक्य, सचिव प्रदीप ज्ञवाली, किरण गुरुङ, पूर्व समान्य प्रशासनमन्त्री लालबाबु पण्डित, संसदको विकास समिति सभापति रविन्द्र अधिकारी लगायत मस्यौदा समितिमा छन् ।  

एमालेले वैशाख १० गतेसम्म उम्मेदवार छनोट गरिसक्ने योजना समेत बनाएको छ । एमाले स्थायी समितिले वडा कमिटीहरूलाई चैत ३० गतेसम्म, गाउँपालिका, नगरपालिका, उपमहानगरपालिका र महानगरपालिका कमिटीलाई वैशाख ४ गतेसम्म उम्मेदवारको नाम सिफारिस गरिसक्न निर्देशन दिइसकेको उपाध्यक्ष रावलले बाताए ।

जिल्ला कमिटीलाई वैशाख ७ गतेसम्म र प्रदेश कमिटीहरूलाई वैशाख १० गतेसम्म उम्मेदवारको सिफारिस तथा निर्णय गरिसक्न निर्देशन दिइएको बताइएको छ । एमालेले स्थानीय तहमा टिकट पाउने उम्मेदवारले प्रदेश र संघीय संसद्को चुनावमा उठ्न नपाउने मापदण्ड समेत बनाएको छ ।

स्थायी समितिको सोमबारको बैठकले ३० चैतबाट छनोट सुरु गरी १२ वैशाखभित्र सबै उम्मेदवारको सूची सार्वजनिक गर्ने गरी प्रक्रिया अघि बढाउने निर्णय गरेको हो । यस्तै, महासचिव ईश्वर पोखरेलको संयोजकत्वमा स्थानीय तह निर्वाचन अनुगमन तथा समन्वय समिति गठन भएको छ ।

ईआइसिटी नेपाल प्रालिद्धारा संचालित हाम्राकुरा डटकममा प्रकाशित कुनै पनि सामाग्री ईआइसिटी नेपालको पूर्व जानकारी विना हुवहु एवं आंशिक रुपमा समेत कपी गरि प्रकाशन गर्नु दण्डनीय छ। यस किसिमका कार्य गर्ने उपर ईआइसिटी नेपाल कानुनी उपचार खोज्न बाध्य हुने भएकाले सम्बन्धित सवैलाई सचेत हुन जानकारी गराइन्छ।

नयाँ