इङलिश प्रिमियर लिग फुटबलः आर्सनल विजयी, मिडिल्सब्रो रेलिगेशन नजिक
प्रकाशित २०७४ वैशाख ५ मंगलबार
336
Shares
रिभरसाइड स्टेडियम । इङलिश प्रिमियर लिग फुटबलमा आर्सनल विजयी भएको छ । आर्सनलले मिडिल्सब्रोलाई २–१ ले पराजित गरेको हो ।
मिडिल्सब्रोको मैदानमा ३१२९८ दर्शकबीच भएको खेलमा आर्सनललाई विजयी गराउन एलेक्सिस सान्चेज र मेसुट ओजिलले १–१ गोल गरे । अल्भारो नेग्रेडोले मिडिल्सलाई सान्त्वना गोल दिलाए ।
यो जितले आर्सनलको शीर्ष चारभित्र रहेर लिग सकाउने धोको अझै पनि पूरा हुने लक्षण देखिएको छ । लिगमा ३२ खेलबाट ७५ अंकको चेल्सी शीर्ष स्थानमा कायमै रहेको छ ।
टोटनह्याम हटसपर ७१ अंकसहित दोस्रो स्थानमा छ । ६६ अंकसहित लिभरपुल तेस्रो स्थानमा छ । ६४ अंकबाट म्यानचेष्टर सिटी चौथो स्थानमा छ ।
आइतबार राति चेल्सीलाई हराएको म्यानचेष्टर युनाइटेट ६० अंकसहित पाँचौं स्थानमा छ । ५७ अंकको आर्सनल छैटौं स्थानमा छ ।
यता २४ अंकको मिडिल्सब्रो १९ औं स्थानमा छ । रेलिगेशनबाट टार्न मिडिल्सब्रोलाई अप्ठेरो परेको छ ।
