कपिलवस्तु । केपी ओली नेतृत्वको सरकारले मुलुकको वर्तमान समस्या समाधान गर्न नसक्ने नेपाली काँग्रेसका उपसभापति रामचन्द्र पौडेलले बताउनुभएको छ ।
बिपीको मेलमिलाप दिवसको अवसर पारेर नेपाली काँग्रेस कपिलवस्तु क्षेत्र नं १ ले आयोजना गरेको कार्यकर्ता भेला तथा जारी संविधान विषयक अन्तरक्रिया कार्यक्रमलाई सम्बोधन गर्दै काँग्रेस उपसभापति पौडेलले काँग्रेसको नेतृत्वमा मधेसी मोर्चाको आन्दोलनको सम्बोधन हुने र मुलुकले निकास पाउने दाबी गर्नुभयो ।
नेता पौडेलले नेकाको आसन्न १३औँ महाधिवेशनबाट पार्टीभित्रको गुटबन्दी र भागबन्डाको खेलको अन्त्य गर्नुपर्नेमा जोड दिनुभयो । सोही कार्यक्रममा बोल्दै पार्टी केन्द्रीय सदस्य मनमोहन भट्टराईले मधेसी जनताको अधिकारको नाममा नभई मधेसी मोर्चाले केवल दोस्रो संविधानसभाबाट गुमेको आफ्नो जनमत फिर्ता ल्याउन मात्रै आन्दोलनलाई हिंसात्मक बनाउँदै गएको आरोप लगाउनुभयो ।
