चेल्सी उपाधिका लागि अझै ढुक्क हुन सकेन, टोटनह्याम पछ्याउँदै
एभर्टनको शीर्ष चार संकटमा
प्रकाशित २०७४ वैशाख १८ सोमबार
387
Shares
गुडिसन पार्क । इङलिश प्रिमियर लिग फुटबलमा अन्तिम चार चरण बाँकी रहँदासम्म उपाधिमाथि ढुक्क हुने अवस्था बनेको छैन ।
उपाधिको दायरा साँघुरो भए पनि उपाधि कसले जित्छ भन्ने टुंगो लाग्न नसकेको हो । उपाधिका लागि चेल्सी र टोटनह्याम हट्सपरमात्र मैदानमा छन् ।
आइतबार रातिको खेलमा एभर्टनलाई उसकै मैदानमा ३–० ले हराउँदै चेल्सी अग्रस्थानमा कायमै छ । चेल्सीलाई जिताउन पेड्रो रोड्रिग्वेज, विलियन र गेरी काहिलले १–१ गोल गरे । यो हारले भने एभर्टनको शीर्ष चारभित्र अट्ने सम्भावना कमजोर बनेको छ ।
टोटनह्यामले आर्सनलमाथि २–० को विजयी नतिजा निकाल्यो । डेले अली र ह्यारी केनले गोल गर्दै टोटनह्यामलाई विजयी गराए ।
यो जितले टोटनह्यामले चेल्सीसंगको अन्तर ४ अंकमै राखेको छ । म्यानचेष्टर युनाइटेड र स्वान्सी सिटीले भने १–१ को बराबरी खेले । त्यसैगरी मिडिल्सब्रो र म्यानचेष्टर सिटीले २–२ को बराबरी खेले ।
३४ खेलबाट ८१ अंकसहित चेल्सी शीर्ष स्थानमा कायमै छ । टोटनह्याम ७७ अंकसहित दोस्रो, लिभरपुल ६६ अंकबाट तेस्रो, म्यानचेष्टर सिटी ६६ अंकसहित चौथो, म्यानचेष्टर युनाइटेड ६५ अंकसहित पाँचौं, आर्सनल ६० अंकसहित छैटौं तथा एभर्टन ५८ अंकसहित सातौं स्थानमा छ । यो अंकतालिकाले तेस्रो र चौथो हुने टिमबीच निकै कडा प्रतिस्पर्धा रहेको छ ।
सन्डरल्याण्ड रेलिगेशनमा परिसकेको छ भने दुई टिमको छिनोफानो हुन बाँकी छ ।
