धनगढी । अत्तरियामा देशकै सर्वाधिक धनराशिको ‘रुस्लान अत्तरिया कप महिला क्रिकेट प्रतियोगिता’ सुरु भएको छ । 

युनाइटेड अत्तरिया स्पोर्टस क्लबको आयोजनामा भएको प्रतियोगितामा विभागीय टोली एफिएफले विजयी सुरुआत गरेको छ । 
उद्घाटन खेलमा विभागीय टोली एपिएफले मिलन क्रिकेट एकेडेमी झापालाई ७ विकेटले पराजित गरेको हो । 

अत्तरियास्थित एपिएफको खेल मैदानमा भएको खेलमा टस जितेर पहिले ब्याटिङ गरेको मिलन क्रिकेट एकेडेमीले निर्धारित २० ओभरमा चार विकेटको क्षतिमा ९३ रन बनायो । 

टोलीलाई सम्मानजनक योगफलसम्म डोहोर्याउन सरस्वती चौधरी र मेन्सी चौधरीको प्रदर्शन उत्कृष्ट रह्यो । दुवै जनाले पाँचौँ विकेटका लागि ४३ रनको अविजित पारी खेले । 

साझेदारीमा सरस्वतीले अविजित २१ र मेन्सीले अविजित १९ रन बनाइन् । टोलीका लागि रितु जैनले १९ रन बनाइन् । कप्तान रुविना क्षेत्रीले १४ रनको योगदान दिइन् । 

एपिएफका लागि करुणा भण्डारीले मात्रै एक विकेट लिइन् । तीन जना खेलाडी रनआउट भए । 

चौरानब्बे रनको विजय लक्ष्य लिएर मैदान उत्रिएको एपिएफले १५।५ ओभरमा तीन विकेटको क्षतिमा लक्ष्य पूरा गर्यो । 

जितमा ज्योति पाण्डेय अर्धशतकीय पारी खेल्दै ५३ रन बनाउन सफल भइन् । त्यस्तै करुणाले अविजित १८ रन बनाइन् । 

करुणा र ज्योतिले चौथो विकेटका लागि ६६ रनको साझेदारी गरे । 

मिलन क्रिकेट एकेडेमीका लागि सङ्गीता राईले दुई विकेट लिइन् । खेलको ‘म्यान अफ द ओमेन’ हुँदै एपिएफकी ज्योतिले रु तीन हजार हात पारिन् । 

प्रतियोगिताअन्तर्गत शुक्रबारको पहिलो खेलमा राइजिङ क्रिकेट वुमन काठमाडौँ र कैलाली जिल्ला क्रिकेट एकेडेमी तथा दोस्रो खेलमा एपिएफ र कञ्चनपुर ११ बीच प्रतिस्पर्धा हुने आयोजकले जनाएको छ । 

करिब रु २५ लाख खर्च हुने टि–२० को विजेताले उपाधिसहित रु दुई लाख तथा उपविजेताले एक लाख हात पार्नेछन् ।

 ‘प्लेयर अफ दि सिरिज’लाई रु २५ हजार तथा बेस्ट ब्याटिङ पर्फर्मेन्स, बेस्ट वलिङ पर्फर्मेन्स र विकेट किपरलाई समान रु १०÷१० हजार प्रदान गरिने आयोजकले जनाएको छ । 

प्रतियोगितामा भाग लिने छ वटै टोलीलाई दुई समूहमा विभाजन गरिएको छ । 

समूह ‘ए’ मा एपिएफ क्लब, मिलन क्रिकेट एकेडेमी झापा र कञ्चनपुर महिला क्रिकेट टोली छन् । 

समूह ‘बी’ मा कैलाली जिल्ला क्रिकेट एकेडेमी, राइजिङ क्रिकेट वुमन काठमाडाँै र बारा क्रिकेट एकेडेमी छन् ।