काठमाडौँ। बाह्र महिनामा हुने प्राकृतिक विविधताका विषय समेटेर सातवटा शास्त्रीय छन्दमा ‘वर्षका सन्तति’ नामक प्रकृति काव्य सार्वजनिक गरिएको छ । कवि सुनील पौडेलले रचना गर्नुभएको काव्य उहाँका १० वर्षीय नाति सुमन पौडेलले आज आयोजित कार्यक्रममा विमोचन गर्नुभयो । कार्यक्रममा नेकपा (एमाले) का सचिव प्रदीप ज्ञवालीले साहित्य आनन्दको विषय भएकाले लेखन यात्रामा लागेको बताउनुभयो ।
एनेकपा (माओवादी)का प्रवक्ता दिनानाथ शर्माले राजनीतिक रुखो विषय र साहित्य आनन्दानुभूतिको काम भएको अनुभव सुनाउनुभयो । कार्यक्रममा त्रिभुवन विश्वविद्यालयका शिक्षाध्यक्ष सुधा त्रिपाठीले काव्यको समाजशास्त्रीय विश्लेषण गर्नुभएको थियो । विमोचन कार्यक्रममा विश्वभाषा क्याम्पसका क्याम्पस प्रमुख वामदेव अधिकारी, भूमिका लेखक ज्ञवाली र प्रभा बराललगायतले कृतिका विषयमा प्रकाश पार्नुभएको थियो । काव्यमा प्रत्येक महिनामा पर्ने चाडबाडका विषयमा पनि शास्त्रीय छन्दमा चर्चा गरिनुको साथै महिनालाई वर्षका सन्ततिका रुपमा उतारिएको जनाइएको थियो ।
