काठमाडौँ । कमला श्रेष्ठ र सञ्जु चौधरीले ललितपुरमा जारी एशियन युथ तथा जुनियर भारत्तोलन च्याम्पियनसिप २०१७ मा राष्ट्रिय कीर्तिमान कायम गरेका छन् । 

कमलाले दोस्रो अन्तर्राष्ट्रिय प्रतियोगितामा ५८ केजी तौल समूहको जुनियर विधाअन्तर्गत स्न्याचमा ६७ केजी, क्लिन एन्ड जर्कमा ८५ केजी गरी कुलमा १५२ केजी भार बहन गर्दै आफ्नै नाममा रहेको कीर्तिमानमा सुधार गरेकी हुन् । 

उनले सातौँ राष्ट्रिय खेलकुदमा स्न्याचमा ६६ केजी र क्लिनमा ७९ केजी गरी कुल १४५ केजी भार बहन गर्दै राष्ट्रिय कीर्तिमान आफ्नो नाममा लेखाएकी थिइन् । 

श्रेष्ठले यसअघि भारतको गुहाटी र सिलोङमा सम्पन्न १२औँ दक्षिण एशियाली खेलकुदमा प्रतिस्पर्धा गरेकी थिइन् । 

यस्तै, सञ्जु चौधरीले पहिलो अन्तर्राष्ट्रिय प्रतियोगितामै राष्ट्रिय कीर्तिमान कायम गर्न सफल भइन् । उनले ग्रुप ‘बी’को ५३ केजी तौलको स्न्याचमा ६० केजी र क्लिन एन्ड जर्कमा ८० केजी गरी कुल १४० केजी भार बहन गर्दै राष्ट्रिय कीर्तिमान कायम गरेकी हुन् । 

देवी चौधरीले सातौं राष्ट्रिय खेलकुदमा राखेको कीर्तिमानलाई भङ्ग गर्दै सञ्जुले राष्ट्रिय कीर्तिमानमा आफ्नो नाम लेखाएकी हुन् । 

आज भएको खेलमा अन्य नेपाली खेलाडीले आफ्नो खेलमा सुधार गर्न सफल भएको प्रशिक्षक जगदीश प्रधानले जानकारी दिए । 

पहिलोपटक अन्तर्राष्ट्रिय प्रतियोगितामा सहभागिता जनाएका टीकामाया गुरुङले ५८ केजी तौलमा स्नाचमा ४५ र क्लिनमा ५५ केजी गरी कुलमा १०० केजी र कविता चौधरीले स्नाचमा ४१ केजी र क्लिन एन्ड जर्कमा ५० केजी गरी कुल ९१ केजी भार बहन गरे । 

यस्तै, पुरुषको ६२ केजी तौलमा साजारुद्घिन आलमले स्नाचमा ५५ र क्लिनमा ८० केजी गरी कुल १३५ केजी भार बहन गरे । 

महिलाको ५३ केजी तौलको युथ र जुनियर दुवैमा चीनकी ज्ञान होङ्गयानले स्वर्ण प्राप्त गरिन् । उनले स्नाच, क्लिन र कुलमा गरी ६ स्वर्ण पदक प्राप्त गरिन् । ज्ञानले स्नाचमा ८३ केजी, क्लिनमा १०८ केजी र कुलमा १९१ केजी भार बहन गरिन् । 

यस्तै, युथतर्फ थाइल्यान्डकी पोर्नचिता नियोमयोङ्गले स्नाचमा ६७ केजीका साथ कास्य र क्लिनमा ९२ केजीका साथ रजत र कुलमा १५९ केजीका साथ रजत प्राप्त गरिन् भने ताइपेइकी चोउ युवानले स्नाचमा ६८ केजीका साथ रजत, क्लिनमा ९० केजी र कुलमा १५८ केजीका साथ कास्य पाइन् । 

जुनियरतर्फ थाइल्याण्डकी सुरोधचना खाम्बाओले स्नाचमा ७५, क्लिनमा ९५ र कुलमा १७० केजी भार बहनका साथ रजत तथा फिलिपिन्सकी पेरेज इलाइन रोजले स्नाचमा ७३, क्लिनमा ९३ र कुलमा १६६ केजीका साथ कास्य पाइन् । रासस