यु–१९ विश्वकप छनोट क्रिकेटः नेपालले के पायो ? सन्दिप लामिछाने मात्रै बने हिरो
प्रकाशित २०७४ साउन ११ बुधबार
382
Shares
काठमाडौं । सिंगापुरमा सम्पन्न यु–१९ वर्ष मुनीको एसियाली समूहको विश्वकप छनौट क्रिकेट खेलेर नेपाली टोली बुधबार नेपाल फर्किदैछ ।
नेपालले अफगानिस्तानसंग पराजय बेहोरेर दोस्रो स्थानमै चित्त बुझाएर फर्किएको हो । नेपाल न त छनोट भयो न त अफगानिस्तानलाई हराउनै सक्यो ।
चार टोली सहभागी प्रतियोगितामा नेपालले मलेसिया र सिंगापुरलाई हराउन सक्यो । डबल राउण्ड रोविनको आधारमा खेलाइएको खेलमा नेपालले अफगानिस्तानसंग दुबै खेल हार्यो ।
पहिलो खेलमा १४१ रनले तथा दोस्रो खेलमा नेपाल अफगानिस्तानसंग ९६ रनले पराजित भयो ।
नेपाल यसअघि पनि अफगानिस्तानसंग विजयी हुन सकेको छैन । नेपालको ब्याटिङ यसपटक पनि चलेन ।
नेपालबाट कोही चले भने ती हुन् कप्तान सन्दिप लामिछाने । उनको ब्याटिङ नचले पनि बलिङ भने राम्रो भयो ।
म्यान अफ द सिरिज बनेका सन्दिपले ६ खेलमा २४ विकेट लिए । उनले पहिलो खेलमा सिंगापुर विरुद्ध ५ विकेट लिए । दोस्रो खेलमा मलेसिया विरुद्ध ५ विकेट नै लिए ।
तेस्रो खेलमा अफगानिस्तान विरुद्ध २ विकेट लिए । चौथो खेलमा सिंगापुर विरुद्ध ४ विकेट लिए । पाँचौं खेलमा मलेसिया विरुद्ध ७ विकेट लिए । छेटौं खेलमा अफगानिस्तान विरुद्ध १ विकेट लिए ।
सन्दिप हिरो भए पनि अफगानिस्तान विरुद्ध बढी विकेट ढाल्न सकेनन् । उनको कप्तानी पनि अफगानिस्तान विरुद्ध राम्ररी चलेन ।
नेपाली खेलाडीको ब्याटिङ चल्न नसक्नु यो प्रतियोगिताको तितो अनुभव हो । सुधार गर्न सकिन्छ ।
