काठमाडौँ । नवौँ पूर्णमान बज्राचार्य स्मृति राष्ट्रिय खुला टेबलटेनिस प्रतियोगिता मंगलबारबाट काठमाडौंमा शुरु हुँदै छ । अखिल नेपाल टेबलटेनिस सङ्घको सहयोगमा काठमाडौँ जिल्ला टेबलटेनिस सङ्घको आयोजनामा शुरु हुने सो प्रतियोगितामा विभिन्न २६ स्पर्धामा प्रतिस्पर्धा हुने आयोजक सङ्घका अध्यक्ष धर्ममान बज्राचार्यले जानकारी दिए ।
उनले प्रतियोगिताअन्तर्गत खुलामा दुई, कलेजमा चार, स्कूलमा आठ, खेलकुद पत्रकारमा दुई, दृष्टिविहीनमा दुई, शारीरिक अपाङ्गमा चार तथा भेट्रानमा पनि समान चार स्पर्धामा प्रतिस्पर्धा हुने बताए ।
खुलातर्फ पुरुष÷महिला सिंगल्समा प्रतिस्पर्धा हुनेछ । त्यसमा पहिलो हुनेले १५ हजार, दोस्रो हुनेले १० हजार तथा तेस्रोले पाँच हजार पुरस्कार पाउनेछन् । बाँकी स्पर्धामा नगद पुरस्कार राखिएको छैन्, आयोजकले जनाएको छ ।
दुई सय ६० खेलाडी प्रतिस्पर्धा गर्ने उक्त प्रतियोगिताका खेल लैनचौरस्थित राष्ट्रिय टेबलटेनिस प्रशिक्षण केन्द्रमा हुनेछ । प्रतियोगिता साउन २१ गतेसम्म सञ्चालन हुनेछ ।
