काठमाडौं । नयाँ शक्ति निर्माणमा लागेका पूर्व प्रधानमन्त्री बाबुराम भट्टराईले राष्ट्रनिर्माता पृथ्वीनारायण शाहलाई सम्मान गर्नु पर्ने धारणा राखेका छन् । राप्रपा नेपालले आयोजना गरेको जलपानमा समेत सरिक भएका भट्टराईले सामाजिक संजाल फेसबुकमा पृथ्वीनारायणको फोटो सहित सन्देश लेखेका छन् ।
उनले भनेका छन्,‘ पृथ्वीनारायण शाहलाई निरपेक्ष र अधिभूतवादी कोणबाट पूजा वा निन्दा गर्ने अतिवादी सोचबाट बचौं । सापेक्ष र ऐतिहासिक भौतिकवादी कोणबाट वस्तुनिष्ठ मूल्यांकन गर्दै नेपालको भौगोलिक एकीकरणमा उनले खेलेको नेतृत्वदायी भूमिकाको सम्मान गरौं ! ।’ २९४औँ पृथ्वी जयन्तीको अवसरमा बाबुरामले पृथ्वीनारायणलाई सम्झिएका हुन् । विगतमा राजाका इतिहास समाप्त पार्ने र शालिक ढाल्ने आन्दोलनमा सरिक भट्टराई अहिले आश्चर्यजनक ढंगले पुरातनवादी भएका छन् ।
