श्रीकृष्ण सिग्देल, स्याङ्जा।नेपाली काँग्रेसका केन्द्रिय सदस्य एंव सांसद गोपालमान श्रेष्ठले प्रधानमन्त्री केपी ओलीलाई मुलुकको राष्ट्रियताको सवालमा शिर नझुकाउन आग्रह गरेका छन् । प्रधानमन्त्रीको अर्को महिना हुने भनिएको भारत भ्रमणको प्रसङग कोट्याउदै नेता श्रेष्ठले भ्रमणको बेला गरीने कुराकानी र आधिकारिक एजेण्डाको लागि सबै पार्टीसगँ छलफल गर्नुपर्ने बताएका हुन् । स्याङ्जाको नयाँ भिरकोट नगरपालिकाको पहिलो नगर परिषद घोषणा सभाको उदघाटन गर्दै नेता श्रेष्ठले मुलुकलाई घात हुने खालको सम्झौता नगर्न पनि प्रधानमन्त्रीलाई आग्रह गरे ।
आफैले निर्माण गरेको संविधान मिचेर जम्वो मन्त्री मण्डल विस्तार गरेको प्रति आक्रोश हुदै नेता श्रेष्ठले संविधान मिच्ने प्रधानमन्त्रीले राष्ट्रियतामाथी घात गर्न सक्नेमा शंका व्यक्त गरे । सरकारले राष्ट्रियतालाई शिर झुकाउने काम गरेमा राम्रो नहुने भन्दै नेता श्रेष्ठले सबै पार्टीका नेताहरु सगँ छलफल गरेर मात्रै भारत भ्रमणमा जान उनले प्रधानमन्त्रीलाई आग्रह गरे । भारतले लगाएको अघोषित नाकाबन्दीका कारण मुलुक जर्जर भएका बेला प्रधानमन्त्रीको भारत भ्रमणलाई काँग्रेसले शंकाको दृष्टिले हेरेको श्रेष्ठले बताए । नाकाबन्दी र भुकम्पले नेपाली जनतामा परेको समस्याको ख्याल नगरी प्रधानमन्त्रीले जे पायो त्यही बोल्दा जनतामा निराशा र सरकार छ की छैन भन्ने अवस्था आएको श्रेष्ठको भनाई छ । लामो समय सरकारलाई सुझाव दिएका श्रेष्ठले अव सबै दलहरु मिलेर राष्ट्र विकासमा लाग्नुपर्ने बताए ।
आन्दोलनका क्रान्ति सकिएको भन्दै नेता श्रेष्ठले अवको क्रान्ति आर्थिक रहेको उल्लेख गरे । भुकम्पबाट स्याङ्जा पनि ठुलो क्षती व्यहोरोको जिल्ला भएको उल्लेख गर्दै व्यवस्थापिका सांसद समेत रहेका श्रेष्ठले सरकारले स्याङ्जाका लागि भुकम्प पिडितलाई पठाएको राहत रकम वितरण नहुनु राम्रो नभएको बताए । तत्काल सरकार र स्थानीय सरकारले भुकम्प पिडितलाई रकम वितरण गर्न समेत आग्रह गरे ।
नगर परिषदमा नेपाली काँग्रेसका केन्द्रिय सदस्य तथा सांसद धनराज गुरुङ्ले हरेक कार्यक्रममा गरिने फजुल खर्चलाई कटाएर गरिव, विपन्न परिवारलाई वितरण गर्न आग्रह गरे । स्याङ्जाको विकास निर्माणमा जहिले पनि आफु हातेमालो गर्दै अगाडी बढ्ने प्रतिवद्धता समेत व्यक्त गरेका नेता गुरुङ्ले सरकारले कालोबजारीलाई प्रश्चय दिएको बताए । सबै मिले मात्रै मुलुक र गाँउको विकास हुने धारणा व्यक्त गर्दै नेता गुरुङ्ले संविधानको कार्यन्वयन सगै मुलुकले नयाँ काचुली फेर्ने उल्लेख गरे ।
परिषद उदघाटन समारोहमा सांसदहरु कमलप्रसाद पंगेनी, मुक्तिप्रसाद पाठक र टेकु नेपालीले स्याङ्जाको विकासका लागि राजनीति नगरी सबै एकजुट हुनुपर्ने धारणा व्यक्त गरे । नयाँ नगरपालिकाको रुपमा बामे सर्दै गरेको भिरकोट नगरपालिका कार्यकारी अधिकृत झविश्वर रेग्मीले चालु र पुँजी गत तर्फ गरी ४ करोड ७५ लाख १७ हजार अनुमानित बजेट पेश गरेका छन् । रेग्मीले राजस्वबाट २० लाख, आन्तरिकबाट २० लाख बाह्रय स्रोत नेपाल सरकारबाट ३८ लाख आय गरिने अनुमान गरेका छन् ।
पुँजीगत तर्फ नेपाल सरकारबाट निर्शत १ करोड ५० लाख, न्युनतम ३० लाख, स्थानीय विकास शुल्क ८७ लाख १७ हजार, भवन निर्माण १ करोड, सवारी साधन ३० लाख गरी करिव ५ करोड बजेट अनुमानित पेश गरेको उल्लेख गरे । नयाँ नगरपालिका भएकाले खानेपानी, पक्की सडक, स्वास्थ्य, सुरक्षा, शिक्षा लगायतका पुर्वाधारहरुमा चुनौति रहेकोले बजेको अभावमा असिमित आवश्यकताहेरी बजेट विनियोजन गरिएको रेग्मीले बताए ।
