काठमाडौँ । गैरआवासीय नेपाली संघ एनआरएनको आठौँ विश्व सम्मेलन एवं महाधिवेशन काठमाडौंको हायात होटलमा सुरु भएको छ । 

शनिबार बिहान राष्ट्रपति विद्यादेवी भण्डारीले सम्मेलनको उद्घाटन गरेकी छिन् । सरकारका तर्फबाट उपप्रधान एवं परराष्ट्र मन्त्री कृष्णबहादुर महराले स्वागत भाषण गर्दै सम्पूर्ण गैरआवासीय नेपालीहरुको नेपाल यात्रा सफल होस् भनी कामना गरेका छन् । 

चार दिनसम्म चल्ने एनआरएनको सम्मेलनको पहिलो दिन उद्घाटन सत्रपछि भूकम्पपछिको पुनर्निर्माणबारे वृहत छलफल हुँदैछ । 

सम्मेलन तथा अधिवेशनले एनआरएनको आगामी कार्यकालका लागि निर्वाचनसमेत गर्दैछ ।

झण्डै दुई हजार प्रतिनिधिले निर्वाचनमा भाग लिँदैछन् । अध्यक्षका लागि संघका उपाध्यक्ष भवन भट्ट, सदस्य जमुना गुरुङ घले र टीबी कार्कीले उम्मेदवारी घोषणा गरेका छन् । 

निकै ठूलो रणनीतिक रुपले एनआरएनका उम्मेदवारहरु लागेकाले घले र भट्टबीच कडा टक्कर हुने अनुमान गरिएको छ ।

के के भनेका छन् त अध्यक्षका उम्मेदवारहरुले –
अध्यक्ष शेष घलेकी पत्नीसमेत रहेकी गुरुङले बिहीबार पत्रकार सम्मेलनको आयोजना गरी संघको महाधिवेशनमा वर्तमान उम्मेदवारी घोषणा गरेकी हुन् । 

उम्मेदवारी घोषणा कार्यक्रममा गुरुङले ‘नेपालीका लागि नेपाली’ भन्ने पवित्र उद्देश्यका साथ शुरु भएको संघमा आफूले गैरआवासीय नेपालीको माग र अपेक्षालाई पूरा गर्ने र महिला सशक्तीकरण र सहभागितालाई संस्थाको मेरुदण्डका रुपमा स्थापित गर्ने विश्वास व्यक्त गरिन्। 

साथै, संघलाई आर्थिक, सामाजिक, सांस्कृतिक एवं कूटनीतिकस्तरमा अझ पारदर्शीरुपमा विकास गर्न र संघले अहिले निर्माण गरिरहेका मेगा परियोजनालाई समयभित्र सम्पन्न गराउन भूमिका खेल्ने प्रतिबद्धतासमेत व्यक्त गरिन् । संघका सदस्यसमेत रहेकी गुरुङले आफू अध्यक्ष पदका लागि योग्य उम्मेदवार भएको र महिलाले नेतृत्व गर्न सक्छन् भन्ने पुष्टि गर्नका लागि पनि आफ्नो उम्मेदवारी भएको स्पष्ट पारिन्। 

यसैबीच, अध्यक्षका अर्का प्रतिस्पर्धी भवन भट्टले पनि यहाँ बिहीबार आयोजित उम्मेदवारी सभामा आफ्नो उम्मेदवारी घोषणा गरे। सो पदका लागि आफू योग्य रहेको दाबी गर्दै भट्टले एनआरएनको उपाध्यक्षको जिम्मेवारीमा रही आफूले सम्पूर्ण गैरआवासीय नेपालीको समस्या, पीर, मर्का बुझेको बताए । 

उनले आवासीय र गैरआवासीय नेपालीबीच सहकार्यका लागि समन्वयको वातावरण तयार गरी एनआरएनको ‘भिजन २०२०’ तथा सामूहिक लगानीका परियोजना कार्यान्वयनमा सहयोगी भूमिका निर्वाह गर्ने प्रतिबद्धता व्यक्त गरे । नेपालमा पूर्वाधार विकास तथा निर्माणमा लगानी बढाउने र रोजगारीको अवसर वृद्धि गर्ने प्रतिबद्धता व्यक्त गर्दै प्रत्यासी भट्टले भने– “आफ्नो जितको पहिलो आधार नै सम्पूर्ण एनआरएनका साथीहरु हुन्, म त लगभग साझा उम्मेदवारका रुपमा उभिएको छु ।” 

उनले आफूलाई एनआरएनका संस्थापक अध्यक्ष डा उपेन्द्र महतो, जीवा लामिछाने र हालका अध्यक्ष डा शेष घलेको पनि पूर्ण साथ र सहयोग रहेको जानकारी गराए। विश्वभरि छरिएर रहेका गैरआवासीय नेपालीको मनमा सधैँ नेपाल र नेपाली नै रहेको उनले बताए । 

भट्टले वर्तमान नेतृत्वले अघि बढाएको लाप्राक नमुना बस्ती निर्माणलाई समयमै सक्ने गरी काम गरिने पनि प्रतिबद्धता जनाए। यसअघि उनले एनआरएन जापानको अध्यक्ष तथा एनआरएन अन्तर्राष्ट्रिय समन्वय परिषद्को कोषाध्यक्ष तथा केन्द्रीय उपाध्यक्षको जिम्मेवारी पूरा गरेका छन् ।