काठमाडौं । बंगलादेशमा जारी आइसीसी अण्डर–१९ विश्वकप क्रिकेटमा नेपालले न्यूजिल्याण्डविरुद्ध शानदार प्रदर्शन गर्दै विजयी सुरुवात गरेको छ । आफ्नो पहिलो खेलमा समूह डी मै रहेको न्यूजिल्याण्डलाई ३२ रनले हराउँदै विजयी सुरुवात गरेको हो । टस हारेर पहिले व्याटिङ गरेको नेपालले दिएको दुई सय ३९ रनको चुनौती पछ्याएको न्यूजिल्याण्ड १७ बल खेल्न बाँकी छँदै मात्र दुई सय ६ रनमा समेटियो । योसंगै नेपालले अघिल्लो चरण प्रवेशको बाटो खुल्ला गरेको छ । सन् २००६ को प्लेट च्याम्पियनसिपमा नेपाल न्यूजिल्याण्डलाई हराउँदै प्लेट च्याम्पियन भएको थियो ।
न्यूजिल्याण्डविरुद्धको अर्को सफलताका रुपमा नेपाली खेलाडीले फेरि एकपटक गर्विलो प्रदर्शन गरेका छन् । खान शाहेव ओस्मान अली स्टेडियम फतुल्लाहमा भएको खेलमा ७ विकेटको क्षतिमा २ सय ३८ रन बनाएको थियो । नेपालका लागि कप्तान राजु रिजालले सर्वाधिक ४८ रन बनाए । भने, ओपनर सन्दीप सुनार र आरिफ शेखले समान ३९ रन जोडे ।
