४ वटा प्रदेशबाट १२ महिला निर्विरोध, कोमल वलीदेखि सरिता प्रसाईसम्म (नामावली)

प्रकाशित २०७४ माघ १० बुधबार

काठमाडौं । राष्ट्रिय सभा सदस्य निर्वाचनको मनोनयन दर्तापछि चार प्रदेशमा १२ महिला सदस्य निर्विरोध देखिएका छन् । सात वटै प्रदेशबाट निर्वाचित हुने ५६ मध्ये महिला समूह (क्लष्टर)बाट मात्रै २१ सदस्य निर्वाचित हुने छन् । यद्यपि, मनोनय दर्ताकै दिन आधा बढी सदस्य निर्विरोध भएका छन् ।

संविधानले नै एउटा प्रदेशबाट ३ महिला अनिवार्य गरेको छ । यस्तै, दलित, अपाङ्ग वा अल्पसंख्यकमा पनि महिला आउन सक्ने बाटो खुला नै छ । जित पक्का भएका पार्टीहरुले एक–एक जना उम्मेदवार उठाएपछि १२ महिला सदस्य निर्विरोध हुन पुगेका हुन् ।

मनोनयनको भोलिपल्ट उम्मेदवारी फिर्ता तथा दावी विरोध पेश गर्ने निर्वाचन कार्यतालिका छ । उनीहरु अहिले नै निर्विरोध चयन भएको औपचारिक घोषणा गर्न नमिल्ने निर्वाचन अधिकृतको कार्यालयले जनाएका छन् । एकल उम्मेदवारी परेकाले १२ सदस्य निर्विरोध हुने पक्का भएको छ ।