प्रदेश १ र ३ मा ओली निकट राई र पौडेल मुख्यमन्त्री कन्फर्म, खनाल र नेपाल हेरेको हेरै

प्रकाशित २०७४ माघ २६ शुक्रबार

काठमाडौं । नेकपा एमाले अध्यक्ष केपी शर्मा ओली निकट शेरधन राई र डोरमणि पौडेल मुख्यमन्त्री हुने कन्फर्म भएको छ । राई प्रदेश नं १ र पौडेल प्रदेश नं ३ को संसदीय दलको नेतामा विजयी भएसँगै मुख्यमन्त्री हुने कन्फर्म भएको हो । संसदीय दलकै नेता मुख्यमन्त्री हुने एमालेको विधान रहेको छ ।

शेरधन राईले पार्टी पुर्व अध्यक्ष झलनाथ खनाल निकट मानिने भीम आचार्यलाई हराए उदै विजयी भए भने माधवकुमार नेपाल निकट अष्टलक्ष्मी शाक्यलाई हराउदै डोरमणि पौडेल संसदीय दलको नेतामा विजयी भए ।

प्रदेश १ को निर्वाचनमा पूर्वमन्त्री राईले २६ र प्रतिस्पर्धी एमालेका सचिवसमेत रहेका आचार्यले २४ मत हासिल गरे। सो प्रदेशमा एमालेका ५१ सदस्य छन् । एक मत भने बदर भएको थियो ।

आचार्यको समर्थक र प्रस्तावकमा गणेश काङवाङ (पाँचथर) र तुलसी न्यौपाने (संखुवासभा) रहेका थिए । राईको प्रस्ताव र समर्थकमा हिक्मत कार्की (झापा) र जगदीश कुशियत(सुनसरी) रहेका थिए ।

त्यस्तै प्रदेश नं ३ को निर्वाचनमा पौडेलले ३४ र प्रतिस्पर्धी अष्टलक्ष्मी शाक्यले २४ मत हासिल गरिन् । सो प्रदेशमा एमालेका ५८ सदस्य छन् । हेटौँडा नगरपालिकाका पूर्व प्रमुख पौडेल मकवानपुरबाट प्रदेशसभा सदस्यमा निर्वाचित भएका थिए ।