सोमबार सभामुख निर्वाचनको मिति तोकिने, अरु के-के छ कार्यतालिका ?

प्रकाशित २०७४ फागुन २० आइतबार

काठमाडौं । आईतबार संघीय संसद्को तल्लो सदनका सांसद्हरुले पद तथा गोपनीयताको सपथग्रहण गरेसँगै संघीय संसद्को औपचारिक सुरुवात भएको छ । आईतबार अपराह्न ४ बजेको लागि बोलाईएको बैठकले सांसद्हरुलाई पद तथा गोपनीयताको सपथ खुवाएसँगै बैठक सोमबारसम्मको लागि स्थगित गरिएको छ ।

संसद्को सोमबारको बैठक पनि अपराह्न ४ बजेका लागि नै बोलाईएको छ । सोमबार पनि बैठकको अध्यक्षता आईतबार ज्येष्ठ सदस्यको हैसियतमा सांसद्हरुको सपथ ग्रहण गराएका महत्थ ठाकुरकै अध्यक्षतामा बैठक बस्नेछ । बैठकको सुरुमा नै ज्येष्ठ सदस्यको हैसियतमा राजपा नेता महन्थ ठाकुरले राष्ट्रविद्यादेवी भण्डारीले संसद् अधिवेशनको लागि पठाएको पत्र पढेर सुनाउने कार्यतालिका रहेको छ ।

त्यस्तै, पत्र पढिसकेपछि प्रतिनिधि सभाको अन्तरिम कार्यविधि २०७४ लाई पारित गर्नको लागि बैठकसमक्ष पेश गर्ने कार्य तालिका रहेको छ । त्यसपछि प्रतिनिधि सभाको अन्तरिम कार्यविधि अनुसार सभामुखको अनुपस्थितीमा बैठकको अध्यक्षता गर्ने सदस्य चयन गर्ने कार्यतालिका रहेको संसद् सचिवालयले जनाएको छ।