क्रिश्चियानो रोनाल्डोको ह्याट्रिकले इस्पानियोलको पोष्टमा रियालको ६ गोल

जिदान राज बढ्दै

प्रकाशित २०७२ माघ १८ सोमबार

एजेन्सी । स्पेनिश लिग ला लिगा फुटबलमा रियाल मड्रिडले इस्पानियोललाई ६–० को फराकिलो अन्तरले हराएको छ । घरेलु मैदान सान्टियागो, बर्नब्यउमा भएको खेलमा रियालले इस्पानियोललाई पुरै खेल अवधिभर दबाबमा राख्यो । दबाबमा परेको इस्पानियोलका पाँच खेलाडीले पहेंलो कार्ड पाए । रियाललाई विजयी गराउन मुख्य फरवार्ड क्रिश्चियानो रोनाल्डोले ह्याट्रिक गरे । करिम बेन्जेमा र जेम्स रोड्रिग्वेजले एक–एक गोल गरे । कोष्टारिका नेशनल फुटबल टिमका डिफेन्डर समेत रहेका २४ वर्षिय इस्पानियोल डिफेन्डर ओस्कार डुअर्टले खेलको अन्तिम समयतिर आत्मघाती गोल गरे ।

खेलको सातौं मिनेटमा बेन्जिमाले गोल गर्दै रियाललाई सुरुवाती अग्रता दिलाए । त्यसको पाँच मिनेटपछि १२ औं मिनेटमा रोनाल्डोले पेनाल्टी मार्फत गोल गर्दै रियालको अग्रता दोब्बर पारे । १६औं मिनेटमा रोड्रिग्वेज तथा ४५औं मिनेटमा रोनाल्डोले व्यक्तिगत दोस्रो गोल गरेपछि पहिलो हाफमा रियल ४–० ले अघि रहयो । ८२औं मिनेटमा रोनाल्डोले ह्याट्रिक पूरा गरे । रोनाल्डोले ह्याट्रिक गरेको चार मिनेटपछि इस्पानियोलका डुअर्र्टले आत्मघाती गोल गरेसंगै रियाल ६–० को फराकिलो अन्तरले विजयी भयो । रियाल मड्रिडमा नयाँ प्रशिक्षक नयाँ प्रशिक्षक जिनेदिन जिदान आएपछि खेलाडी आक्रामक बनेका छन् । रियालले छोटो समयमै प्रशिक्षक राफा बेनिटेजलाई बर्खास्त गरी जुनियर टिम प्रशिक्षक जिदानलाई सिनियर टोलीको जिम्मा दिएको हो ।

जितसंगै रियालले शीर्ष स्थानको बार्सिलोनासँग अंक दूरी कम गरेको छ । तेस्रो स्थानमा रहेको रियालको २२ खेलबाट ४७ अंक भएको छ । एक अंक बढी रहेको एथ्लेटिको मड्रिड दोस्रो स्थानमा छ । शीर्ष स्थानको बार्सिलोनाको २१ खेलबाट ५१ अंक भएको छ । रियालसँग पराजित भएपछि २२ खेलबाट २२ अंक नै जोडेको इस्पानियोल लिगको अंक तालिकामा १५ औं स्थानमा छ । यसैबीच, आइतबार राति भएका अन्य खेलमा सेभियाले घरेलु मैदानमा लेभान्तेलाई ३–१ ले पराजित गर्दा भ्यालेन्सिया स्पोर्टिङ गिजोनसंग १–० ले स्तब्ध भयो । लस पल्लमसले सेल्टा भिगोविरुद्ध २–१ को संघर्षपूर्ण जित निकाल्यो ।