पर्यटन विश्वविद्यालय खोल्ने योजनामा पर्यटन मन्त्री अधिकारी

प्रकाशित २०७४ चैत ८ बिहिबार

काठमाडौँ। संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीले कुल गार्हस्थ उत्पादनमा पर्यटनको योगदान २५ प्रतिशत पुर्या‍इने गरी कार्ययोजना तयार भइरहेको बताएका छन्।

पर्यटन पत्रकार संघ (जाट–नेपाल) का प्रतिनिधिमण्डलसँग बिहिवार मन्त्रालयमा भएको भेटमा मन्त्री अधिकारीले जिडिपीमा अहिले भइरहेको ३.५ प्रतिशत हाराहारीको योगदानलाई बढाउने गरी कार्ययोजना बनाइरहेको बताउँदै भने, “अबको एक वर्षमा पर्यटन क्षेत्रमा आम नेपालीले नयाँ महसुस गर्नुहुनेछ ।”

सन् २०२० सम्ममा १५ लाख पर्यटक नेपाल भित्र्याउने गरी मन्त्रालयले काम गरिरहेको उनको भनाइ थियो । मन्त्री अधिकारीले पर्यटन पूर्वाधार विकासमा सरकारले विशेष ध्यान दिने र बाँकी निजी क्षेत्रको सहयोगमा दिगो विकासको कार्ययोजना अगाडि बढाइने बताए ।