काठमाडौं । ‘मैने प्यार किया’ बाट फिल्मी करियर सुरु गरेका दबंग स्टार सलमान खान त्यही बेला अर्थात् ३० वर्षअघि नेपाल आएका थिए । त्यसपछि उनी नेपाल आउन जुरेन । गत महिना नेपाल आउने साइत बनेको थियो । उनको दबंग टुर अन्तिम समयमा तुहियो । जसले गर्दा आगामी बैशाखमा पुनः हुन्छ भनिएको थियो । तर ती दंगब स्टारको काठमाडौं हल्लाउने चाहना सम्भवतः पूरा हुने छैन । 

किनकि २० वर्षअघि अति दुर्लभ कालो हरिण (कृष्णसार) मारेको आरोपमा उनी दोषी ठहरिएका छन् । उनलाई पाँच वर्षको जेल सजाय सुनाइएको छ । बिहिबार सलमान खान जेल पुगेका छन् । त्यो पनि परिचित जेल जोधपुरको भीआइपी जेल । 

हुनत त्यो जेल उनका लागि नौलो हैन । यही कृष्णसार मारेको काण्डमा उनी दुई पटक त्यो जेलमा बसिसकेका छन् । सन् २००६ मा पाँच वर्षका लागि जेलसजाय सुनाउँदा उनी ६ दिन जेल बसेका थिए । त्यस्तै अहिलेसम्म उनी जम्मा १८ दिन जेल बसिसकेका छन् । 

यसपटक उनलाई १०६ नम्बरको बिल्ला दिएर वार्ड नम्बर २ को एउटा कोठामा राखिएको छ । ११ वर्षपछि जोधपुर जेल पुग्दा धेरै बदलिएको छ । त्यतिबेला अर्थात् २००६ मा २१० नम्बरको बिल्ला भिरेर भित्र छिर्दा उनलाई निकै तनाव भएको थियो । हत्या आरोपमा सजाय काटिरहेको महेश सैनी त्यहाँ थियो । गन्हाउने शौचालय भएका कारण उनलाई निकै तनाव भएको थियो । गर्मी उत्तिकै थियो । 

अहिले सलमानका छिमेकी यौनकाण्डमा मुछिएका महसुस बापू कहलिएका आशाराम साथमा हुनेछन् । आशाराम सन् २०१३ को सेप्टेम्बरदेखि नै त्यो जेलमा छन् । एक नाबालिग छात्राको यौन उत्पीडन आरोपमा आफूलाई आध्यात्मिक गुरु बताउने आशाराम जेलमा परेका हुन् । उनलाई भेट्न अहिले पनि जेलमा मानिसहरु जाने गर्दछन् । 

सलमानलाई विशेष सुरक्षा किन ?
सलमानलाई विशेष सुरक्षा रहेको कोठामा राखिने छ । प्रत्येक चालको कैद हुने गर्दछ । उनलाई सुरक्षा दिनुको कारण छ । पंजाब हरियाणाको कुख्यात ग्यांगस्टर लरेन्सले ८ जनवरीमा कोर्टमा पेश हुने क्रममा पुलिसको उपस्थितिमा खुलेआम सलमानलाई मार्ने धम्की दिएका थिए । त्यो ग्याङस्टरले आफू अपराध बिना जेलमा रहेको र अब पुलिस पनि त्यही चाहेको छ भने सलमानलाई नै मारेर केही गरेर देखाउँछु भनेको थियो । लरेन्स हाल भरतपुर जेलमा रहेको छ । उसका २० गुन्डाहरु भने जोधपुर जेलमै बन्द छन् । 

सलमानले ११ वर्षअघि शौचालय सुधार र हरेक कोठामा फ्यान राख्ने वाचा गरेका भए पनि पुरा गरेनन् । तर जेलर भन्छन् यसपटक शौचालयको सलमानलाई कुनै गुनासो आउने छैन । 

उनलाई जमानतमा छुटाउनका लागि शुक्रबार उनका वकिलहरुले पहल गर्नेछन् । तर उनले कम्तीमा एक दिन यसपटक जेलमा बस्नुपर्ने भएको छ । 

उनी जेलमै बस्नुपर्यो भने करोडौं भारतीय रुपैयाँ बलिउडमा डुब्नेछ ।

के के हुन्छ ? 
१, उनको ‘रेस –३’ चलचित्रको छायांकनको क्रममै छ । रेमो डिसूजाको निर्देशनमा बनिरहेको यो फिल्मको बजेट सय करोड रुपैयाँको हो । 
 २, सलमानले ‘भारत’ चलचित्रमा काम गर्दैथिए । सलमान जेलमै बस्न परे यो फिल्म बीचमै थन्किने छ । फिल्म आगामी जुनबाछट सुटिङ हुँल हुँदै थियो । 
३, ‘दबंग–३’ को सुटिङ यसैवर्षको अन्त्यमा हुँदैथियो । यसअघिका दुवै सिक्वेल हिट भएका थिए । 
 ४, ‘किक–२’ चलचित्र पनि बन्ने क्रममा थियो । यो ‘किक’ को सिक्वेल हो । 
५, ‘बिग बोस’ को १२ औ सिजन सुरु हुँदैछ । यसमा पनि सलमानले नै कार्यक्रम चलाउने छन् । 

सलमानको ‘बिइङ ह्युमन’ कम्पनीमार्फत थुप्रै गरिबले सहयोग पाउँछन् । काम पनि पाइरहेका छन् । यदि सलमान पाँच वर्ष जेल बसे भने के होला ? उनलाई जेलसंगै १० हजार भारतीय जरिवाना गरिएको छ ।