- सुन चाँदी दर
- विनिमय दर
- नेपाली पात्रो
- राशिफल
एमाओवादीको आज बसेको स्थायी समितिको बैठकले राष्ट्रप्रमुख सहमतिको आधारमा चयन हुनुपर्ने निष्कर्ष निकालेको छ । व्यवस्थापिका–संसद् सचिवालयले सहमतिका आधारमा राष्ट्रपति वा उपराष्ट्रपतिको निर्वाचन प्रक्रिया अन्त्य भएको र बहुमतीय प्रक्रियामा प्रवेश गरेको भए पनि त्यसैभित्र सहमति खोज्न सकिनेमा जोड दिएको प्रवक्ता दीनानाथ शर्माले जानकारी दिनुभयो ।
‘‘हामीले संविधान लेखन प्रक्रियामा एक स्थानमा रहेका प्रमुख राजनीतिक दल राष्ट्रप्रमुखको चयनमा एक ठाँउमा उभिनुपर्छ भन्नेमा जोड दिएका छौँ ।’’ शर्माले भन्नुभयो ।
सहमति नभए भण्डारीलाई मतदान
एमाओवादीले राष्ट्रपति निर्वाचनमा सहमति हुन नसकेका खण्डमा नेकपा(एमाले)का उम्मेदवार विद्यादेवी भण्डारीलाई मतदान गर्ने निर्णय गरेको छ । एमालेको आज बसेको स्थायी समितिको बैठकले पार्टी उपाध्यक्ष भण्डारीलाई राष्ट्रपतिको उम्मेदवार बनाउने निर्णय गरेको थियो ।
‘‘बहुमतीय प्रक्रियाका आधारमा अगाडि बढ्दा हामीले एमालेको उम्मेदवारलाई मतदान गर्नुपर्छ, हामी त्यसमा प्रतिबद्ध छौँ, बाहिर आएका गलत हल्लाको पछाडि कोही पनि लाग्नु आवश्यक छैन’’ शर्माले भन्नुभयो ।
एमाओवादीले उपराष्ट्रपतिमा माओवादी सेनाका पूर्वप्रमुख नन्दबहादुर पुन पासाङलाई उम्मेदवार बनाउने निर्णय गरेको छ । स्थायी समिति सदस्य समेत रहनुभएका पुनः तत्कालीन माओवादीले सञ्चालन गरेको सशस्त्र सङ्घर्षका नेतृत्वकर्ता हुनुहुन्थ्यो । संविधानसभाको दोस्रो निर्वाचनमा काठमाडौँ क्षेत्र नं ४ मा नेपाली काँग्रेसका उम्मेदवार गगनकुमार थापासँग उहाँ पराजित हुनुभएको थियो ।